SNN-
سەرۆکی یەکێتیی نیشتمانیی کوردستان لە دیداری مێری لە هەولێر بەشداری دەکات، ئەوەش لەکاتێکدایە ساڵی پار بافڵ تاڵەبانی بە ناونیشانی (لە چوار ساڵی داهاتوودا چاوەڕوانی چی بکەین؟) بەشداریکرد و زۆرترین کاردانەوەی لێکەوتەوە.
ئەمڕۆ سێشەممە دیداری مێری دەستیپێکرد و چەندین پانێڵ بەڕێوەدەچن، کە تیایدا بافڵ جەلال تاڵەبانی، سەرۆکی یەکێتیی نیشتمانیی کوردستان و قوباد تاڵەبانی، جێگری سەرۆک وەزیرانی هەرێم، قسەدەکەن.
لە دیداری مێریدا چەندين وەفد، پسپۆڕ و قسەکەری نێودەوڵەتی، ناوچەیی و ناوخۆیی ئامادەدەبن و گفتوگۆ لەسەر چەندين بابەتی گرنگی رۆژ دەکەن.
دیداری مێری 2025 تیشک دەخاتە سەر تەحەددیاتی دەستبەجێی سیاسەتی عێراق و هەرێمی كوردستان، گۆڕانی دیمەنی ناوچەیی و دەرفەتە سەرهەڵداوەکان بۆ هاوکاری نێودەوڵەتی. زنجیرەیەک تەوەری کاتی و ستراتیژی لە ڕێگەی مشتومڕی سیاسەت و شیکاری قووڵەوە دەکۆڵرێتەوە، لەوانە پەرەسەندنی داینامیکی دەسەڵاتی جیهانی و ناوچەیی، سیاسەتی ئەمریکا لە ڕۆژهەڵاتی ناوەڕاست، ئاسۆی ئاشتی لە لێڤانت، چاکسازی لە دامەزراوە سەرەکییەکانی دەوڵەت، بە دامەزراوەییکردنی پەیوەندییەکانی ناوەند و پەراوێز، پێشخستنی پێکەوەژیانی ئێتنۆ-ئاینی و زۆر بواری دیكە.
