پۆلیسی سلێمانی: تەقەکەرەکانی بەردەم نەخۆشخانەی شار دەستگیرکرا

SNN

شەوی رابردوو کۆمەڵێک کەس لەبەردەم نەخۆشخانەی شاری سلێمانی بە هەڕەمەکی تەقەیان کردووە، پۆلیسی سلێمانی دەڵێت: تەقەکەرەکانمان دەستگیرکردووە.

ئەمڕۆ هەینی 10ی تشرینی یەکەم، بەڕێوەبەرایەتی پۆلیسی سلێمانی لە راگەیەنراوێکدا ئاشکرایکردووە، سێ‌ تۆمەتبار لەسەر ڕووداوەكەی شەوی ڕابردووی نەخۆشخانەی شار لەلایەن مەفرەزەکانی بەشی پۆلیسی فریاکەوتنی بەڕێوەبەرایەتیمان و بنکەی پۆلیسی نەخۆشخانەوە دەستگیرکران.

ئاماژەی بەوەکردووە، شەوی ڕابردوو پاش کاتژمێر 12 ی نیوەی شەو سێ‌ كەس بەمەبەستی سەردانیکردن دەچنە نەخۆشخانەی شار ، بەهۆكاری ئەوەی سەردانیكردن بەپێی یاسا و ڕێنماییە بەركارەكان لەو کاتەدا ڕێگە پێدراو نییە ، کارمەندی پاسەوانی بنکەی پۆلیسی نەخۆشخانە ڕێکاری گونجاو دەگرێتە بەرو ڕێگرییان لێدەكات.

لە بەشێکی تری راگەیەنراوەکەدا هاتووە، دەستگیرکراوان یەکێکیان دور لە ڕاستی خۆی بە پزیشکی نەخۆشخانە دەناسێنێت و یەکێکیشیان لەژێر کاریگەری مەی نۆشیدایە ، گرژی و ئاڵۆزی دەخوڵقێنن و هێرش دەكەنە سەر کارمەندەکەمان و یەكێكیان چەكی كارمەندەکە دەڕفێنێت و تەقە دەكات و هەڵدێت .

جەختکراوەتەوە، دەستبەجێ‌ لەلایەن بنکەی پۆلیسی نەخۆشخانەوە دووان لە تۆمەتبارەكان دەستگیرکران و لەماوەیەكی زۆر كەمیشدا تۆمەتباری سێیەم لە لایەن مەفرەزەكانی بەشی پۆلیسی فریاكەوتنی بەڕێوەبەرایەتیمانەوە لە گەڕەكی كوردستان دەستگیركرا .

ئەو سێ کەسەی تۆمەتباربوون بە رووداوی تەقەکردنەکەی بەردەم نەخۆشخانەی شار، بە ناوەکانی: س ، س لەدایكبووی 1969 و ب ، س ، س لە دایكبووی 2006 و ب، س، س لەدایكبووی 2004 ، بەپێی ماددەی (٣١/٤٠٥) لەیاسای سزاکانی عێراقی ڕاگیراون و لێكۆڵینەوە لەگەڵیان بەردەوامە .