کەشناسیی هەرێم: خۆڵبارین شارەکان دەگرێتەوە و باران لە شاخەکان دەبارێت

SNN

بەرێوەبەرایەتیی گشتیی کەشناسی و بوومەلەرزەزانیی هەرێمی کوردستان، هۆشداری لە بەرزبوونەوەی کاریگەریی خۆڵبارین لە سەنتەری پارێزگاکان دەدات و پێشبینیی بارینی نمەبارانیش لە ناوچە شاخاوییەکان دەکات.

لەسەنتەری شارەکان خۆڵدەبارێت

بەپێی پێشبینییەکانی بەڕێوەبەرایەتیەکە، سبەی دووشەممە، ئەگەری بەرزبوونەوەی کاریگەریی خۆڵبارین لەسەر بەشێک لە ناوچەکانی باشووری هەرێم و سەنتەری پارێزگاکان هەیە، بەتایبەتی لە کاتەکانی دوای نیوەڕۆدا.

باران لە ناوچە شاخاوییەکان

کەشناسیی هەرێم ڕایگەیاندووە، ئەمڕۆ ئاسمان ساماڵ دەبێت و پلەکانی گەرما 1-2 پلە بەرزدەبنەوە. بەڵام سبەی دووشەممە، بەهۆی کاریگەریی نزمە پاڵەپەستۆیەکی لاوازەوە، لە ناوچە شاخاوییە سنوورییەکانی پارێزگای دهۆک و هەولێر، لە کاتەکانی بەرەبەیاندا نمە بارانی پچڕ پچڕ دەبارێت.

پلەکانی گەرما دادەبەزن

هاوکات لەگەڵ بارانبارین و خۆڵبارینەکە، پلەکانی گەرما سبەی دووشەممە نزم دەبنەوە. بەرزترین پلەی گەرمای پێشبینیکراو لە گەرمیان، هەولێر و زاخۆ دەبێت، لە کاتێکدا نزمترین پلە لە حاجی ئۆمەران تۆمار دەکرێت.

کەشناسیی عێراقیش پشتڕاستی کردووەتەوە کە سبەی باران لە ناوچە شاخاوییەکانی هەرێم دەبارێت و پلەکانی گەرما نزم دەبنەوە، بەڵام ئاماژەی بەوەش کردووە کە لە کۆتایی هەفتەوە پلەکانی گەرما لەسەر ئاستی گشتیی عێراق بەرزبوونەوە بەخۆیانەوە دەبینن.