دابەشکردنی نەوتی سپی لەهەرێمی کوردستان دەستیپێکرد

SNN-

وەزارەتی سامانە سروشتییەکان دەستیکرد بە دابەشکردنی نەوتی سپی لە ناوچە شاخاوییەکان و رایگەیاند، هەر خێزانێک بڕی 200 لیتر نەوت بە نرخی 104 هەزار دینار وەردەگرێت، لە کاتێکدا نرخەکەی لە بازاڕدا گەیشتووەتە 165 هەزار دینار.

دەستپێکردنی پرۆسەکە

وەزارەتی سامانە سروشتییەکان لە راگەیەندراوێکدا بڵاویکردەوە، لە ئەمڕۆوە، 13ـی تشرینی یەکەمی 2025، پرۆسەی دابەشکردنی نەوتی سپی بۆ وەرزی زستان لە ناوچە شاخاوییەکانی پارێزگاکانی هەولێر، سلێمانی، هەڵەبجە، دهۆک و ئیدارە سەربەخۆکانی سۆران، راپەڕین، گەرمیان و زاخۆ دەستپێدەکات. رونیشیکردووەتەوە کە پشکی هەر خێزانێک یەک بەرمیل (200 لیتر) دەبێت.

جیاوازیی نرخ لەنێوان حکومەت و بازاڕدا

نرخی یەک بەرمیل نەوت کە لەلایەن حکومەتەوە دابین دەکرێت 100 هەزار دینارە و چوار هەزار دیناریش کرێی گواستنەوەی بۆ زیاد دەکرێت. ئەمە لە کاتێکدایە کە لە بازاڕەکاندا نرخی هەر بەرمیلێک گەیشتووەتە 180,000 هەزار دینار، کە هۆکارەکەی بۆ نزیکبوونەوەی وەرزی سەرما دەگەڕێتەوە.

سەرچاوەی دابینکردنی نەوتەکە

دابینکردنی ئەم بڕە نەوتە بەشێکە لە رێککەوتنی نێوان حکومەتی هەرێمی کوردستان و حکومەتی فیدراڵی، کە بەپێی رێککەوتنەکە، رۆژانە 50 هەزار بەرمیل نەوت بۆ پێداویستییەکانی ناوخۆی هەرێم (بەنزین، نەوتی سپی و گازوایل) تەرخان دەکرێت و ئەوەی دەمێنێتەوە رادەستی کۆمپانیای سۆمۆ دەکرێت