بەهۆی خۆپیشاندانەوە سەرۆکی ماداگاسکار ناچاربوو لە وڵاتەکەی رابکات

SNN

دوای چەندین رۆژ خۆپیشاندان دژی گەندەڵی و نەبوونی ئاو و کارەبا و پەیوەستبوونی بەشێک لە سوپا بە خۆپیشاندەران، ئاندری راجویلینا سەرۆکی ماداگاسکار ناچار بوو، بە فڕۆکەیەکی سەربازی فەرەنسی هەڵبێت و وڵاتەکەی جێبهێڵێت.

لە رۆژی 25ی ئەیلولەوە خۆپیشاندان لە ماداگاسکار دەستیپێکردبوو، لە خۆپیشاندانەکەدا لانیکەم 22 کەس کوژراون و زیاتر لە 100 کەسیش برینداربوون.

رۆژی شەممە یەکەی کاپساتی سەر بە سوپا لە نزیک پایتەخت چوونە پاڵ خۆپیشاندەران و داوایان لە پۆلیس و هێزەکانی دیکەی سوپا کرد بە هیچ جۆرێک رووبەڕووی خۆپیشاندەران نەبنەوە.

ئاژانسی رۆیتەرز لە زاری سەرکردەیەکی ئۆپۆزسیۆنی ماداگاسکارەوە بڵاویکردەوە، کە سەرۆک ئاندری راجویلینا وڵاتی بەرەو شوێنێکی نادیار جێهێشتووە و باس لەوەدەکرێت بە فڕۆکەیەکی سەربازی فەڕەنسی گواسترابێتەوە بۆ دەرەوەی ئەو وڵاتە.

هاوکات میدیای فەرەنسیش هەواڵی هەڵاتنی ئاندری راجویلینای پشتڕاست کردووەتەوە.

ساڵی 2009 دوای خۆپیشاندانێک، هەمان یەکەی سوپای چووە پاڵ خۆپیشاندەران و ئاندری راجویلینا بەهۆیەوە هاتبووە سەرکار.