کاندیدێکی پەرلەمانی عێراق کوژرا
سەفا مەشهەدانی، فۆتۆی ئەو کاندیدەی لە بەغدا کوژرا
SNN
بەرەبەیانیی ئەمڕۆ، چوارشەممە، کردەیەکی تیرۆرکردن بەربژێرێکی هەڵبژاردنی ئەنجوومەنی نوێنەرانی عێراقی کردە ئامانج و لە ئەنجامدا بەربژێرێکی هاوپەیمانیی سیادە لە بەغدا کوژرا و چوار لە پاسەوانەکانیشی بریندار بوون.
سەفا مەشهەدانی، کە ئەندامی ئەنجوومەنی پارێزگای بەغدایە و خۆی لەسەر لیستی هاوپەیمانیی سیادەیە بە سەرۆکایەتیی خەمیس خەنجەر، بەربژێرکردووە بۆ هەڵبژاردنی ئەنجوومەنی نوێنەرانی عێراق، لە کاتی گەڕانێکی مەیدانیدا بووە لە ناوچەی تارمیەی بەغدا، کاتێک بۆمبێکی لکێنراو، کە پێشتر بە ئۆتۆمبێلەکەیدا لکێنرابوو، تەقیوەتەوە. لە ئەنجامی تەقینەوەکەدا، ناوبراو گیانی لەدەستدا و چوار لە هاوکارەکانیشی بریندار بوون.
ئەمە بە یەکەمین کردەی کوشتن دادەنرێت کە تێیدا بەربژێرێکی هەڵبژاردنی داهاتووی ئەنجوومەنی نوێنەران، کە بڕیارە لە 11ـی تشرینی دووەم بەڕێوەبچێت، دەکرێتە ئامانج.
هاوپەیمانیی سیادە یەکێکە لە گەورەترین هاوپەیمانییە سوننەکان و لەلایەن خەمیس خەنجەرەوە سەرۆکایەتی دەکرێت، هەروەها مەحمود مەشهەدانی، سەرۆکی ئێستای ئەنجوومەنی نوێنەرانی عێراق، یەکێکە لە دیارترین کەسایەتییەکانی. ئەم هاوپەیمانییە لە پارێزگاکانی بەغداد، کەرکووک، دیالە، سەڵاحەدین، نەینەوا و ئەنبار بەشدارێکی سەرەکیی هەڵبژاردنەکانە.
