لیستی مووچەی مانگی 10 ئامادە دەکرێت؛ چارەنووسی مانگەکانی 8 و 9 نادیارە
پارە
SNN
سەرەڕای ئەوەی هێشتا مووچەی مانگەکانی 8 و 9ـی فەرمانبەران دابەش نەکراوە، دەست بە ئامادەکردنی لیستی مووچەی مانگی 10 کراوە و بەرپرسانی سیستمی بایۆمەتریش جەخت لەوە دەکەنەوە کە دەتوانن لە ماوەی 48 کاتژمێردا لیستەکە تەواو بکەن.
“دەستمان بە ئامادەکردنی لیستی مووچە کردووە”
بەرپرسانی فەرمانگەکانی بایۆمەتری لە هەولێر، سلێمانی و دهۆک پشتڕاستیان کردەوە کە ماوەی دوو ڕۆژە دەست بە ئامادەکاری بۆ لیستی مووچەی مانگی 10 کراوە و سیستمی “پەیڕۆڵ” بۆ فەرمانگەکان کارا کراوە تاوەکو زانیارییەکان تۆمار بکەن.
فرسەت سەلیم، بەڕێوەبەری بایۆمەتریی دهۆک، ڕایگەیاند: “لە تواناماندایە لە 48 کاتژمێردا لیستەکە ئامادە بکەین، بەڵام ئێستا هەفتەیەک مۆڵەتمان داوەتە فەرمانگەکان.”
هەولێر و بەغدا چاوەڕێی یەکتر دەکەن
ئامادەکردنی لیستی مووچەی مانگی 10 لە کاتێکدایە کە هێشتا مووچەی مانگەکانی 8 و 9 خەرج نەکراوە.
بەپێی زانیارییەکان، 120 ملیار دیناری داهاتی نانەوتیی هەرێمی کوردستان ئامادەیە، بەڵام بەغدا چاوەڕێی ناردنی ئەو داهاتەیە، لە بەرامبەردا هەولێریش چاوەڕێی بڕیاری بەغدایە بۆ خەرجکردنی مووچە، ئینجا داهاتەکە ڕەوانە دەکات.
