شەرع دەچێتە روسیا و لەگەڵ پوتن کۆدەبێتەوە
کۆشکی سهرۆكایهتی ڕوسیا (کرێملن) ڕایگەیاند، ڤلادیمێر پوتن، سەرۆکی ڕوسیا ئهمڕۆ چوارشەممە لەگەڵ ئەحمەد شهرع، سەرۆککۆماری سوریا له مۆسكۆ کۆدەبێتەوە.
یەکەمین سەردانی ئهحمهد شهرع بۆ ڕوسیا
ئەوە یەکەمین سەردانی ئهحمهد شهرعه بۆ ڕوسیا لە دوای لادانی بەشار ئەسەد، هاوپەیمانی مۆسکۆ لە ساڵی ڕابردودا.
شەرع و پوتن کۆدەبنەوە
ئەمڕۆ ئاژانسی هەواڵی عەرەبی سوریا (سانا) بڵاویکردەوە، کە بڕیارە شهرع لە سەردانەکەیدا بۆ ڕوسیا لەگەڵ پوتن کۆببێتەوە و تاوتوێی پێشهاتە ناوچەیی و نێودەوڵەتییەکانی بەرژەوەندی هاوبەش و گەڕان بەدوای ڕێگاکانی پێشخستنی هاوکاری بۆ خزمەتکردنی بەرژەوەندییە هاوبەشەکانی هەردوو وڵات بکات.
ئهحمهد شهرع لە مانگی شوباتی ڕابردودا پەیوەندییەکی تەلەفۆنی لە هاوتا ڕوسییەکەیەوە پێگەیشت، لەمیانی بانگەوازەکەدا پوتن پشتیوانی وڵاتەکەی بۆ یەکپارچەیی خاکی سوریا و سەروەری و سەقامگیری سوریا دوپاتکردەوە، هەروەها ئامادەیی ڕوسیای دەربڕی بۆ پێداچونەوە بەو ڕێککەوتنانەی کە لەگەڵ ڕژێمی پێشودا ئەنجامی داوە.
داوای رادەستکردنەوەی ئەسەد دەکات
بەگوێرەی ئاژانسی ڕۆیتەرز، چاوەڕوان دەکرێت یەکێک لە تەوەرە سەرەکییەکانی سەردانەکەی شەرع، داواکاریی فەرمی بێت بۆ ڕادەستکردنەوەی بەشار ئەسەد، بەمەبەستی دادگاییکردنی لەسەر ئەو تاوانانەی کە دژی گەلی سووریا ئەنجامی داون.
ئەمە لە کاتێکدایە کە بەشار ئەسەد دوای ڕووخانی ڕژێمەکەی، هەڵات و لەلایەن ڕووسیاوە پێشوازیی لێکرا.
