هاووڵاتیانی كەركوك: ئەوەی پارێزگاری ئێستا كردوویەتی بۆ شارەكەمان بە هیچ پارێزگارێك نەكراوە

عەلی حەمە سەعید-SNN
هاووڵاتیان و چین و توێژەجیاوازەكانی كەركوك جەخت لەوەدەكەنەوە كە ئەوەی لەماوەی دووساڵی ڕابردوودا پارێزگای كەركوك بۆ شارەكەی كردووە بەبێ‌ جیاوازی نەتەوە، بە هیچ پارێزگارێكی پێش خۆی نەكراوە، تەنانەت جگە لەكورد نەتەوەكانی دیكەی ناو كەركوكیش شاهێدی بۆ ئەوە دەدەن.
سەعد محەمەد، یەكێك لەچالاكوانی شاری كەركوك بە SNNی ڕاگەیاند: بەدەر لەوەی ئێستا كاتی بانگەشەیە و هەر كەسێك بەمافی خۆی دەزانێت بەرگری لە حزبەكەی خۆی بكات، بەڵام جیاواز لەوە ئەوەی ( ڕێبوار تەها) پارێزگاری كەركوك لەماوەی کەمتر لە دوو ساڵی ڕابردوودا بۆ كەركوك كردوویەتی زۆر جێگای دەستخۆشییە، چونكە تەنها كاری بۆ گەڕەكە كوردییەكان نەكردووە وەك ئەوەی پارێزگاری پێشوو تەنها لە ناوچەیەكی دیاریكراو كاری دەكرد.
ئاماژەی بەوەشكرد، لەگەڵ دەستبەكار بوونی ئیدارەی نوێ و  پارێزگاری كەركوك ژمارەیەك لە كۆمپانیا بیانییە باوەڕپێكراوەكان دەستیان كردووەتەوە بە چالاكی وەبەرهێنان لە پارێزگاكە و گرێبەستیان ئیمزا كردووە بۆ ئیشكردن لە كێڵگەكانی نەوت و غاز، لەكاتێكدا پێشتر نزیكەی 10 ساڵ بوو كارەكانیان راگرتبوو، ئەمەش بووەتە ڕەخساندنی هەلیكار بۆ گەنجان و هاووڵاتیانی سنورەكە.
ئەو چالاكوانەی شاری كەركوك ئەوەشی خستەڕوو، كار و پرۆژەكانی پارێزگاری كەركوك بەجۆرێكە كە هاووڵاتیان و دانیشتووانی گەڕەكەكانی نەتەوە جیاوازەكاتنیش شاهێدی بۆ خزمەتەكانی پارێزگاری كەركوك بدەن، بەجۆرێك ئەو پرۆژانەی ئێستا جێبەجێدەكرێن جیاوازییان تیادا ناكرێت كە زنجیرەیەك پڕۆژەی ستراتیجی لە خۆدەگرێت، كە بۆ یەكەمجارە پارێزگای كەركوك بەخۆیەوە بیبینێت.