مووچەی هەرێم لە کارنامەی کۆبوونەوەی ئەنجوومەنی وەزیرانی عێراقدا نییە

SNN

ئەنجومەنی وەزیرانی عێراق ئەمڕۆ کۆبوونەوەی هەفتانەی هەیە و پرسی مووچەی هەرێمیش نەخراوەتە بەرنامەی کۆبوونەوەکە.

ئەمڕۆ ئەنجوومەنی وەزیرانی عێراق کۆبوونەوەی ئاسایی خۆی ساز دەکات. بەگوێرەی زانیارییەکان ئەگەرچی پرسی مووچەی فەرمانبەرانی هەرێمی کوردستان بە فەرمی لە کارنامەی کۆبوونەوەکەدا نییە، بەڵام ئەگەری هەیە لە پەراوێزی کۆبوونەوەکەدا تاوتوێ بکرێت.

هەر پیەوەست بە دوایین پێشهاتەکانی پەیوەست بە مووچە پێشتر سەرچاوەیەک لە لقی سلێمانی بانکی ناوەندیی هەرێم رایگەیاندبوو، سەرلەبەیانی ئەمڕۆ 48 ملیار دینار لە داهاتی سلێمانی بۆ هەولێر نێردراوە. ئەمەش بە مەبەستی ئەوەی وەزارەتی دارایی هەرێمی کوردستان بیخاتە سەر کۆی داهاتی ناوخۆ و بۆ بەغدای بنێرێت.

بە گوێرەی زانیارییەکان دوای گەیشتنی 48 ملیار دینارەکەی سلێمانی، وەزارەتی دارایی هەرێم بڕی 120 ملیار دینار لە داهاتی ناوخۆ ڕەوانەی بەغداد دەکات. لە بەرامبەردا، حکومەتی عێراق مووچەی مانگی ئابی مووچەخۆرانی هەرێمی کوردستان دەنێرێت.

پێشتر، محەممەد شیاع سوودانی، سەرۆکوەزیرانی عێراق، ڕایگەیاندبوو کە حکومەتەکەی لە هەوڵی دۆزینەوەی چارەسەرێکدایە بۆ پرسی داهاتی نانەوتیی هەرێمی کوردستان، بە شێوەیەک کە کاریگەریی نەرێنی لەسەر بەردەوامیی خەرجکردنی مووچە نەبێت.