بەدواداچوونى کەناڵ8: مووچەى مانگى نۆ بە فشارى سیاسیى نەبێت پێش هەڵبژاردن ڕەوانە ناکرێت

SNN

بەگوێرەى بەدواداچوونى کەناڵ8، حکومەتی عێراق ئامادە نییە مووچەی مانگی نۆی فەرمانبەرانی هەرێمی کوردستان پێش هەڵبژاردنەکان بنێرێت، مەگەر فشارێکی سیاسیی ئاستی باڵا بخرێتە سەر سەرۆک وەزیران.

تەنها یەک ڕێگەچارە هەیە: گفتوگۆی ئاستی باڵا

سەرچاوەکان لە بەغدا ئاشکرایان کردووە، تەنها لە یەک حاڵەتدا مووچەی مانگی نۆ پێش هەڵبژاردنی 11ی تشرینی دووەم دەگات، ئەویش ئەوەیە کە سەرۆکی حیزبە دەسەڵاتدارەکان یان سەرۆک وەزیرانی هەرێم، ڕاستەوخۆ گفتوگۆ لەگەڵ محەمەد شیاع سودانی بکەن.

مەرجی بەغدا: ڕادەستکردنی داهاتی نانەوتی

بۆ ناردنی مووچەی مانگی نۆ، پێویستە حکومەتی هەرێمی کوردستان داهاتی نانەوتیی هەمان مانگ، کە بڕەکەی 120 ملیار دینارە، ئامادە بکات و ڕەوانەی بەغدای بکات.

داهاتی نانەوتیی هەرێم؛ سلێمانی ئامادەیە و هەولێر و دهۆک چاوەڕوانی بڕیارن

بەپێی زانیارییەکان، داهاتی نانەوتیی مانگی نۆی سلێمانی کە 48 ملیار دینارە، ئامادەیە بۆ ناردن. بەڵام داهاتی هەولێر و دهۆک هێشتا ئامادە نەکراوە و بڕیاری ناردنی هەموو داهاتەکەش لە دەسەڵاتی ئەنجوومەنی وەزیرانی هەرێمدایە.

وەزیرە کوردەکان لە بەغدا؛ چاوەڕوانی فشاری سیاسی دەکەن

زانیارییەکان ئەوەش دەخەنەڕوو کە وەزیرە کوردەکان لە حکومەتی عێراق ناتوانن ڕاستەوخۆ داوای ناردنی مووچە لە سودانی بکەن، تا ئەو کاتەی فشاری سیاسی لەلایەن سەرکردایەتیی حیزبەکانەوە دروست دەکرێت، ئینجا ئەوان دەتوانن لە پەراوێزی کۆبوونەوەکانی ئەنجوومەنی وەزیراندا ئەو پرسە بجوڵێنن