تەنیا لە بۆردومانەکەی شەوی رابردووی ئیسرائیل 89 کەس کوژراون کە 35یان منداڵن
لە پێنجەمین ڕۆژی هێرشەکاندا بۆ سەر کەرتی غەززەی گەمارۆدراو، سوپای ئیسرائیل بەردەوامە لەسەر هێرشەکانی و لە ئاکامی هێرش بۆ سەر ناوچەی شێخ ریزوان، خانووی فۆتۆگرافەری ئاژانسی ئانادۆڵو، عەلی جەدەڵلا ڕووخا. جەدەڵڵا دەستی براکەی ماچ کرد کە لە هێرشەکەدا گیانی لەدەستدا. ( Mustafa Hassona - ئاژانسی ئانادۆڵو )
SNN
دوای ئەوەی سوپای ئیسرائیل هێرشەكانی بۆسەر كەرتی غەززە دەستپێكردەوەو چەندین ناوچەی بۆردومانكرد، تەندروستی غەززە بڵاویكردەوە، تائێستا 89 كەس كوژراون، كە 35 كەس لە قوربانییەكان منداڵن.
شەوی رابردوو سوپای ئیسرائیل دوای ئەوەی بزوتنەوەی حەماسی بە پێشێلكردنی ئاگربەستی نێوانیان تۆمەتباركرد، هێرش و بۆردومانەكانی بۆسەر كەرتی غەززە دەستپێكردەوەو چەندین ناوچەی بە مووشەك و درۆن بۆردومانكرد.
بەپێی نوێترین ئاماری تەندروستی فەلەستین لە كەرتی غەززە، تائێستا 89 كەس لەئەنجامی هێرش و بۆردومانەكانی سوپای ئیسرائیلەوە كوژراون، كە 35 كەسیان منداڵن، هاوكات دەیان كەسی دیكەش بریندار بوون.
هێرشەكانی ئیسرائیل، هەریەك لە ناوچەكانی خان یونس، ناوەڕاستی غەززە و كەمپی نوسەیڕاتی گرتەوە، كە گومان دەكرێت، لەو ناوچانەوە حەماس جموجۆڵی چەكداری لەدژی سوپای ئیسرائیل ئەنجامدابێت.
