خۆراك و ئاردی 700 هەزار كەس لەهەرێمی كوردستان دەبڕدرێت
SNN
ئەمڕۆ چوارشەممە 29ی تشرینی یەكەمی 2025 نەوزاد شێخ كامیل، بەڕێوەبەری گشتیی بازرگانی لە وەزارەتی بازرگانی و پیشەسازی، بەمیدیای نزیك لە پارتی راگەیاند: “لە رۆژی 27ی 10ئەم مانگەوە ئامادەكاری بۆ دابەشكردنی بەشەخۆراكی حەوتەمی ئەمساڵ دەستیپێكردووە و بریكارەكان پسووڵەیان وەرگرتووە و لەم هەفتەیەدا لە رێگەی بریكارەكان خۆراك دابەش دەكرێت.”
وتیشی: “بەشەخۆراكی حەوتەم پێكهاتووە لە برنج سێ كیلۆ، شەكر كیلۆیەك، زەیت لیترێك، 400 گرام دۆشاوی تەماتە و كیلۆیەك لە پاقڵەمەنییەكان.”
نەوزاد شێخ كامیل جەختیكردەوە “ئەو 700 هەزار كەسەی هەرێمی كوردستان كە بەهۆی پڕنەكردنەوەی فۆڕمی ئەلیكترۆنیی خۆراك، بەشەئارد و بەشەخۆراكیان بڕاوە، بۆ بەشەخۆراكی تازەش پێیان نادرێت، چونكە هێشتا پڕۆسەی خۆتۆماركردنی نوێ نەكراوەتەوە.”
روونیشیكردەوە: “ئەوانەی خۆراكیان راگیراوە، كەی فۆرمیان پڕ كردەوە دەبنەوە خاوەن فۆرم و لە مانگەكانی ئاییندە خۆراك و ئاردیان بۆ دێتەوە و ئەو مانگانەی لێیان بردڕاوە قەرەبوو ناكرێنەوە”.
بەشداربووانی پسووڵەی خۆراك لە هەرێمی كوردستان كە فۆرمی ئەلیكترۆنیی خۆراكیان پڕ كردووەتەوە، ژمارەیان چوار ملیۆن و 638 هەزار و 672 كەسە.
