یادگار جەبار: کۆتایی ئەم هەفتەیە مووچەی مانگی 10 رەوانەی بەغدا دەکرێت
لیستی مووچەی مانگی 10 و چارەنوسی مووچەی مانگی 9
SNN
لەکاتێکدا چارەنووسی مووچەی مانگی نۆ هێشتا ناڕوونە، سەرپەرشتیاری بایۆمەتریی سلێمانی ڕایدەگەیەنێت کە لیستی مووچەی مانگی 10ـی فەرمانبەران دوای وردبینییەکی چڕ، کۆتایی ئەم هەفتەیە ئاراستەی بەغدا دەکرێت.
لیستی مووچەی مانگی 10 ئامادەیە
یادگار جەبار، سەرپەرشتیاری بایۆمەتریی سلێمانی، بە کەناڵ8ـی ڕاگەیاند: “لیستی مووچەی مانگی 10 لە سلێمانی تەواو کراوە و ڕەوانەی وەزارەتی دارایی کراوە.”
وردبینییەکی چڕ بۆ “بنەمای 36 مانگ”
یادگار جەبار جەختی لەوە کردەوە، وردبینییەکی زۆر ورد لە لیستەکەدا دەکرێت، چونکە ئەم لیستە دەبێتە بنەما بۆ مووچەی 36 مانگی داهاتوو. ناوبراو وتی: “نابێت هیچ هەڵەیەک بڕوات، بەتایبەت دەبێت وردبینیی تەواو لە لێبڕینی 3%ی مووچەی فەرمانبەراندا بکرێت و هەڵەی تێدا نەبێت، پاشان بە سیستمی ‘پەیڕۆڵ’ ڕەوانەی بەغدا دەکرێت.”
تایملاینی وەزارەتی دارایی
بەپێی زانیارییەکانی کەناڵ8 لە وەزارەتی دارایی، وردبینی لەو لیستانە دەستیپێکردووە کە گەیشتوونەتە وەزارەت، بەڵام هێشتا ژمارەیەکی کەم لە یەکە ژمێریارییەکان ماون داتاکانیان بنێرن و مۆڵەتیان تا ڕۆژی یەکشەممە، 2ی تشرینی دووەم، هەیە. وەزارەتی دارایی پلانی داناوە لە ماوەی سێ ڕۆژدا وردبینییەکە تەواو بکات و لە کۆتایی ئەم هەفتەیەدا لیستەکە ڕەوانەی بەغدا بکات.
چارەنووسی مووچەی مانگی نۆ
ئەم هەنگاوانە لە کاتێکدایە کە لیستی مووچەی مانگی نۆی فەرمانبەرانی هەرێم لە بەغداد پەسەند کراوە، بەڵام تا ئێستا ناردنی پارەکە یەکلایی نەبووەتەوە و دیار نییە ئاخۆ پێش هەڵبژاردنەکانی 11ی تشرینی دووەم دەنێردرێت، یاخود دەکەوێتە دوای پرۆسەکە.
