هاوکاری دارایی هاوپەیمانان بۆ مانگی 10 دابەش دەکرێت

SNN

وەزارەتی پێشمەرگە لە راگەیەنراوێکدا ئاشکرایدەکات، هاوکاریی هاوپەیمانان خراوەتە سەر هەژماری وەزارەتەکەیان و سبەینێ دەست بە دابەشکردنی دەکەن.

ئەمڕۆ چوارشەممە 5ی تشرینی دووەم، وەزارەتی پێشمەرگە لە راگەیەنراوێکدا ئاماژە بەوەدەکات، هاوکاریی دارایی هاوپەیمانان بۆ مانگى 10 خرایە سەر هەژماری وەزارەتی پێشمەرگە.

ئاشکرایدەکات، هەر ئەمڕۆ لەلایەن بەڕێوەبەرایەتى گشتى بودجە و بەرنامەکان (ژمێریارى سەربازى) دەستدەکرێت بە ئەنجامدانی رێکارە دارایی و ژمێریارییەکان بۆ تەواوکردنی ئامادەکارییەکان و بۆ ئەم مەبەستەش رۆژی پێنجشەممە دەست بە دابەش کردنی دەکرێت.

ئەوەشخراوەتە روو، لەم مانگەدا، زیاتر لە ٪97ی ئەفسەر و پلەدار و پێشمەرگە لەڕێگەی پڕۆژەی هەژماری من هاوکاری هاوپەیمانان وەردەگرن، ئەوانەی تریش لە رێگەی سیستەمی بانکیەوە هاوکارییەکان وەردەگرن.

هاوکات، بەرپرسێکی وەزارەتی دارایی هەرێم پێشتر بە SNNی راگەیاندبوو، بڕی پارەی هاوكاری دارایی هاوپەیمانان بۆ لیواهاوبەشەكان ئامادەیە و ڕۆژی پێنج شەممەی ئەم هەفتەیە  دەستدەكرێت بە دابەشكردنی.

ئەو سەرچاوەیە وتبووشی، “بڕی هاوكارییەكە لەمانگی ڕابردوو 183هەزار دیناربوو، بەڵام بۆ ئەم مانگە بڕەكەی بۆ 80 هەزار و 750 دینار كەمكراوەتەوە، ئەوەش بەهۆی ئەوەی ژمارەی ئەو ئەفسەر و پێشمەرگانەی خراونەتە سەر لیواهاوبەشەكان زیادیكردووە.”