بافڵ جەلال تاڵەبانی: خانەقینییەکان سندوقەکان سەوز دەکەن

SNN-

لە کەرنەڤاڵی بانگەشەی هەڵبژاردنی یەکێتیی نیشتمانیی کوردستان لە خانەقین، بافڵ جەلال تاڵەبانی، سەرۆکی یەکێتی، وتارێکی پێشکەش کرد و تێیدا جەختی لەسەر پەیوەندیی مێژوویی نێوان یەکێتی و خانەقین کردەوە و چەندین بەڵێنی بە خەڵکی ناوچەکە دا.

خانەقین و یەکێتی؛ پەیوەندییەکی دانەبڕاوبافڵ جەلال تاڵەبانی لە وتارەکەیدا ئاماژەی بەوە کرد کە “خانەقین و یەکێتی هەرگیز لەیەک جیانابنەوە،” و وتی: “چاوی نەیاران کوێر دەکەین و هەرگیز خانەقین جێناهێڵین.” هەروەها شانازیی خۆی بە مێژووی شارەکە دەربڕی و ڕایگەیاند: “شانازی بە خانەقین و تێکۆشەر و شەهیدەکانیەوە دەکەین.”ڕۆحیەتی بەرگری و تێکشکاندنی دوژمنان

بافڵ تاڵەبانی ئاماژەی بە ڕۆڵی مێژوویی خانەقین کرد لە تێکشکاندنی دوژمناندا و وتی: “خانەقین سەرکەوت بەسەر دیکتاتۆرییەت” و “داعش و بەعس لە خانەقینەوە تێکشکێندران.” جەختیشی کردەوە کە “ڕۆحیەتی خانەقین بوو کە عێراقی ڕزگارکرد و داعشی شکاند.” لەم نێوەندەدا، یادی فەرماندەی حیزبەکەی”جەبار فەرمان”ی کردەوە و بە “شێرەکەی خانەقین” ناوی برد.

چەپکە گوڵەکەی سەرۆک مام جەلالسەرۆکی یەکێتی، خانەقینی بە نموونەی پێکەوەژیان و فرەڕەنگی وەسف کرد و وتی: “خانەقین نموونەی چەپکە گوڵەکەی سەرۆک مام جەلالە.” لە دەستپێکی قسەکانیشیدا سڵاوی لە جوانیی ناوچەکە کرد و وتی: “سڵاو لە خانەقین و گەرمەسێڕی هەمیشە سەوز.”بەڵێنی خزمەتکردن و پڕۆژەی گەورە

بافڵ جەلال تاڵەبانی ڕەخنەی لە کەمتەرخەمییەکان گرت و ڕایگەیاند: “خانەقین بەهەشتی کوردستانە و وەک پێویست خزمەت نەکراوە.” لە بەرامبەردا چەندین بەڵێنی بە خەڵکی شارەکە دا و وتی: “ئەوەی دەیڵێین جێبەجێی دەکەین و بەڵێن دەدەین خزمەتی خانەقین بکەین.” هەروەها بەڵێنی دا: “دەبێت پڕۆژەی گەورە بۆ گەنجانی خانەقین جێبەجێ بکەین و دەمانەوێت نوێنەرایەتیی خانەقین لە بەغداد و هەرێمی کوردستان زیاد بکەین.”

بانگەواز بۆ سەرخستنی یەکێتی

لە کۆتاییدا، سەرۆک بافڵ تاڵەبانی متمانەی خۆی بە خەڵکی خانەقین نیشان دا و وتی: “خانەقینییەکان بەبێ ئەوەی پێیان بوترێت سندوقەکان سەوز دەکەن.” وتارەکەشی بە وتەیەکی سەرۆک مام جەلال کۆتایی پێهێنا و وتی: “وەک مام دەیوت ‘یان کەرکووک و خانەقین، یان تا ماوین دەجەنگین’