سودانی سەردانی هەرێمی کوردستان دەکات

SNN-

دوای ڕاگەیاندنی ئەنجامە بەراییەکانی هەڵبژاردن، جموجوڵی لایەنە سیاسییەکان بۆ پێکهێنانی حکومەتی نوێ دەستیپێکردووە. عەممار حەکیم لە بەغدا زنجیرەیەک کۆبوونەوەی ئەنجامداوە و بڕیاریشە ناوەڕاستی ئەم هەفتەیە سەرۆکوەزیرانی عێراق سەردانی هەرێمی کوردستان بکات.

کۆبوونەوەکانی بەغدا

عەممار حەکیم، سەرۆکی ڕەوتی حیکمە، لە چوارچێوەی هەوڵەکاندا لەگەڵ هەریەک لە:

موحسین مەندەلاوی، جێگری سەرۆکی پەرلەمان و سەرۆکی هاوپەیمانیی “ئەساس”.

فالح فەیاز، سەرۆکی دەستەی حەشدی شەعبی.

کۆبووەوە. بەپێی ڕاگەیەندراوی نووسینگەکەی، لە کۆبوونەوەکاندا جەخت لەسەر گرتنەبەری هەنگاوە دەستوورییەکانی دوای هەڵبژاردن و پێکهێنانی حکومەتێکی بەهێز کراوەتەوە.

لەلایەکی دیکەشەوە، قەیس خەزعەلی، ئەمینداری گشتیی عەسائیبی ئەهلی حەق لەگەڵ فالح فەیاز کۆبووەتەوە و هەمان پرسیان تاوتوێ کردووە.

سەردانە چاوەڕوانکراوەکەی سودانی

بەپێی زانیارییەکان، محەمەد شیاع سودانی، سەرۆک وەزیرانی عێراق، ناوەڕاستی ئەم هەفتەیە سەردانی هەرێمی کوردستان دەکات.

لە سەردانەکەیدا، سودانی چەندین دیداری سیاسی ئەنجام دەدات و دواتریش بەشداری لە پانێڵێکدا دەکات لە زانکۆی ئەمریکی لە دهۆک.

ئەم جموجوڵە سیاسییانە لە کاتێکدایە کە کۆمیسیۆنی هەڵبژاردنەکان هێشتا ئەنجامی کۆتاییی هەڵبژاردنی ڕانەگەیاندووە و تەنها ئەنجامە بەراییەکان ئاشکرا کراون