تاقیکردنەوە
SNN-
سبەینێ, شەممە، تاقیکردنەوەکانی نیوەی وەرزی یەکەم لە سەرجەم خوێندنگە بنەڕەتی و ئامادەییەکانی هەرێمی کوردستان دەستپێدەکات. وتەبێژی وەزارەتی پەروەردەش دڵنیایی دەدات کە خوێندنگەکان ئامادەکاریی تەواویان کردووە و پرۆسەکە بەپێی خشتەی دیاریکراو بەڕێوەدەچێت.
ئامادەکارییەکان تەواو بوون
سامان سیوەیلی، وتەبێژی وەزارەتی پەروەردە رایگەیاند، “خوێندنگەکان خۆیان ئامادەکاری بۆ تاقیکردنەوەی نیوەی وەرز دەکەن و سبەی بەگوێرەی ڕۆژمێری پەروەردەیی تاقیکردنەوەکان دەستپێدەکات.”
وتیشی، تاقیکردنەوەکان لە یەک کاتدا هەردوو کەرتی خوێندنی حکومی و ناحکومی دەگرێتەوە.
خشتەی کاتەکانی تاقیکردنەوە
بەپێی ڕۆژمێری وەزارەتی پەروەردە، کاتەکانی تاقیکردنەوەی وەرزی یەکەم بەم شێوەیەیە:
تاقیکردنەوەی نیوەی وەرز: لە 16ی تشرینی دووەم دەستپێدەکات.
تاقیکردنەوەی کۆتاییی وەرز: لە 15ی کانوونی یەکەم دەستپێدەکات.
کۆتایی وەرزی یەکەم: ڕۆژی 24ی کانوونی یەکەم دەبێت.
