لە شەوی رابردووەوە دەیان گەڕەكی هەولێر بێ‌ كارەبان و تا ئەمڕۆش كارەبایان نییە

عەلی حەمە سەعید-SNN
بەهۆی ئەو شەپۆلە باران بارینەی كە ڕووی لە هەرێمی كوردستان و ناوچەكە كردووە و لەهەندێك ناوچەش رەشەبای لەگەڵدایە، لە نزیكەی 15 گەڕەكی شاری هەولێر لە شەوی ڕابردووەوە كارەبای 24 كاتژمێرییەكەیان بڕاوە و تا ئەمڕۆش كارەبایان بۆ نەگەڕاوەتەوە.

وەلید سادق، یەكێك لە دانیشتووانی گەڕەكی هەڤاڵان لە هەولێر بە SNNی ڕاگەیاند: لە شەوی ڕابردووەوە كارەبامان بڕاوە و پەیوەندیمان بە تیمەكانی بەڕێوەبەرایەتی كارەبا كردووە بۆ ئەوەی گرفتەكە چارەسەر بكەن، بەڵام تا بەرەبەیانی ئەمڕۆ كارەبامان بۆ نەگەڕاوەتەوە.

ئاماژەی بەوەشكرد، تیمەكانی كارەبا ئەوەیان پێوتوین كە پچڕانی كارەبا كێشەی تەكنیكیە و بەهۆی ڕەشەبا و باران بارینەوە ئەو كێشەیە دروست بووە و لە هەوڵی چارەسەركردنی ئەو كێشە تەكنیكیانەن.

بەگوێرەی زانیارییەكانی SNNجگە لە گەڕەكی هەڤاڵان هەریەكە لە گەڕەكەكانی( ڕۆشنبیری، كارێزان، ڕاستی، مامۆستایانی 99 زانكۆ، 121 گوڵان، بنەسڵاوە، كانی قڕژاڵە، زانیاری، زاگرۆس، توڕەق، نەورۆز و شێخ ئەحمەد)، لە درەنگانی شەوی ڕابردووەوە تا ئێستا كارەبایان نیە.