کۆمسیۆن: ئەمڕۆ ئەنجامی کۆتایی هەڵبژاردن ڕادەگەیەنرێت

SNN-

جێگری وتەبێژی کۆمیسیۆنی هەڵبژاردنەکانی عێراق ڕایگەیاند، بڕیارە ئەمڕۆ دووشەممە، ئەنجامی کۆتایی هەڵبژاردنەکان ڕابگەیەنرێت، ئەمەش دوای ئەوەی سەرجەم سکاڵاکان یەکلایی کراونەتەوە و هیچ کاریگەرییەکیان لەسەر ئەنجامە بەراییەکان نەبووە.

سکاڵاکان یەکلایی کرانەوە

نیبراس ئەبو سۆدە، بە کەناڵ8ـی وت، “سەرجەم ئەو 102 سکاڵایەی پێشکەشکرابوون، یەکلایی کراونەتەوە و هیچ کاریگەرییەکیان لەسەر ئەنجامی بەرایی نەبووە، چونکە هیچ سکاڵایەکی سووریان تێدا نەبوو.”

دەرگای تانەلێدان دەکرێتەوە

جێگری وتەبێژی کۆمسیۆن ڕوونیکردەوە، دوای ڕاگەیاندنی ئەنجامە کۆتاییەکان، قۆناغی تانەلێدان دەستپێدەکات:

ماوەی تانەلێدان: بۆ ماوەی سێ ڕۆژ، هەموو لیست و بەربژێرەکان مافی پێشکەشکردنی تانەیان هەیە.

وەڵامی کۆمسیۆن: کۆمسیۆن لە ماوەی حەوت ڕۆژی کارکردندا وەڵامی تانەکان ئامادە دەکات و بۆ دەستەی دادوەریی هەڵبژاردنی بەرز دەکاتەوە.

بڕیاری کۆتایی: دەستەی دادوەری لە ماوەی 10 ڕۆژدا وردبینی لە وەڵامەکان دەکات و بڕیاری کۆتایی لەسەر پەسەندکردن یان ڕەتکردنەوەی تانەکان دەدات.

ئەبو سۆدە ئاماژەی بەوەشکرد، “هەندێکجار دەستەی دادوەری پێویستی بە کاتی زیاتر دەبێت، بەتایبەت ئەگەر پرۆسەکە دووبارە ژماردنەوەی دەنگەکانی تێبکەوێت.”