بەڕێوەبەری کەشناسیی سلێمانی: شەپۆلی بارانبارینەکە کۆتایی هات

SNN

شەپۆلێکی بارانبارین ناوچە جیاجیاکانی هەرێمی کوردستانی گرتەوە و لە هەندێک ناوچە بڕێکی زۆر باران باری، بەڵام بەڕێوەبەری کەشناسیی سلێمانی ڕایدەگەیەنێت کە شەپۆلەکە کۆتایی هاتووە.

ئامێدی و ئاکرێ؛ زۆرترین باران
بەپێی داتاکانی کەشناسی، لە ماوەی 12 کاتژمێری ڕابردوودا زۆرترین ڕێژەی بارانبارین لە قەزای ئامێدی تۆمارکراوە کە 24.2 ملم بووە، هاوکات لە بازیان 21.4 ملم و لە بارزان 18.4 ملم باران باریوە. لە بەرامبەردا، کەمترین ڕێژە لە قەزای خەبات بووە کە تەنها 0.2 ملم بووە.

سلێمانی؛ باران کەمتر لە پارساڵ
جەوهەر حەمەلاو، بەڕێوەبەری کەشناسیی سلێمانی، ڕایگەیاند کە لە ماوەی 24 کاتژمێری ڕابردوودا 21.3 ملم باران لە سەنتەری شاری سلێمانی باریوە و کۆی گشتیی ئەمساڵ گەیشتووەتە 57.6 ملم. ناوبراو ئاماژەی بەوەشکرد، “سەرەڕای ئەوەی بارانەکە بەهێز بوو و بووە هۆی کۆبوونەوەی ئاو، بەڵام هێشتا بەراورد بە پارساڵ کە 92.2 ملم باریبوو، ئەمساڵ 34.6 ملم باران کەمتر باریوە”.

کەشوهەوا جێگیر دەبێتەوە
سەبارەت بە پێشبینییەکانی کەشوهەوا، جەوهەر حەمەلاو دووپاتیکردەوە کە “بەگوێرەی پێشبینییەکان شەپۆلەکە کۆتایی هاتووە و پلەکانی گەرما ڕوو لە بەرزبوونەوە دەکەن”.