زانیاری نوێ‌ لەبارەی ئەگەری فەوتانی دوو مووچەی كۆتایی ئەمساڵ

عەلی حەمەسەعید-SNN
بریكاری پێشووی وەزارەتی دارایی عێراق ئاماژە بەوەدەكات ئەگەر بەرپرسانی هەرێمی كوردستان لە گفتوگۆكانیان لەگەڵ بەرپرسانی حكومەتی عێراق بتوانن فشار بكەن بۆ ئەوەی دوو مووچەی كۆتایی ئەمساڵ نەفەوتێت و گەرەنتی پاراستنی ئەو دوو مووچەیە بدەن، بەپێچەوانەوە لە ئەگەری زۆرەوە مووچەی مانگەكانی 11 و 2ی ئەمساڵ دەفەوتێت.

فازڵ نەبی، بریكاری پێشتری وەزارەتی دارایی عێراق بە SNNی ڕاگەیاند: حكوومەتی عێراق بیانوویەكیان هەیە لەبارەی پێدانی دوو مووچەی كۆتایی ئەمساڵی هەرێم، بەڵام ئەگەر ئەو دوو مووچەیە خەرج بكەن، هیچ كێشەیەكی یاساییان بۆ دروست نابێت.

ئاماژەی بەوەش كرد، بە رێژەی 90% ئەگەری فەوتانی دوو مووچەی ئەمساڵ هەیە، ئەو ئەگەرە كەمەی كە ماوە بۆ نەفەوتانی دوو مووچەی كۆتایی ئەمساڵ ئەوەیە كە بەرپرسانی حكومەتی هەرێم پێویستە فشار بكەن و ئەو دوو مووچەیە رزگار بكەن.

بریكاری پێشووی وەزیری دارایی عێراق ئەوەشی خستەڕوو، تا عێراق یەك بەرمیل نەوت بە زیاتر لە 55 دۆلار بفرۆشێت، بۆیە هیچ كێشەیەكی دارایی و نەختینەیی لە عێراق دروست نابێت ئەگەر بڕیار لەسەر خەرجكردنی ئەو دوو موچەیەش بدات.