وتەبێژی كۆمیسیۆن: زیاتر لە 500 سكاڵامان ئاراستەی دەستەڵاتی دادوەری كردووە
عەلی حەمە سەعید-SNN
وتەبێژی كۆمسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، لەكۆتایی پرۆسەی وەرگرتنی سكاڵای لایەنەكان لەسەر ئەنجامەكانی هەڵبژاردن، بەگشتی 872 سكاڵاتۆماركرا، بەڵام لەو ژمارەیە ئێمە تەنها 528 سكاڵامان ئاراستەی دەستەڵاتی دادوەری كردووە و ئەوانی دیكە ڕەتكراونەتەوە.
جمانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بە SNNی راگەیاند: دوای ڕاگەیاندنی ئەنجامی كۆتایی هەڵبژاردنەكان لەو ماوەیەكەی كە بۆ وەرگرتنی سكاڵاكان دیاریكرابوو بەكۆی گشتی 872 سكاڵا لە ئەنجامەكان تۆماركران، بەڵام بەشێكی ئەو سكاڵایانە وەڵامیان درایەوە و بەشێكی دیكەشیان ڕەتكرانەوە.
ئاماژەی بەوەشكرد، لەكۆی ئەو 872 سكاڵایەی كە ئاراستەمان كرا، 528 سكاڵامان ئاراستەی دەستەڵاتی دادوەری كرد بۆ ئەوەی ئەوان بڕیاری كۆتاییان لەبارەوە بدەن و دواتر بەفەرمی ئەنجامەكان پەسەند بكرێن.
بەگوێرەی یاسا، دوای پەسەندكردنی ئەنجامەكانی هەڵبژاردن و كۆتایی هاتنی وادەی تانەدان لە ئەنجامەكان، پاشان سەرۆك كۆمار وادەی یەكەم كۆبوونەوەی پەرلەمان دیاریدەكات بۆ سوێندخواردنی پەرلەمانتاران ودوای هەڵبژاردنی سەرۆكی پەرلەمان، پاشان سەرۆكی گەورەترین فراكسیۆن ڕادەستپێردرێت بۆ پێكهێنانی حكومەت، بەڵام تا ئێستا لایەنە سیاسییەكان نەگەیشتوونەتە ڕێككەوتن لەسەر دیاریكردنی سەرۆكی كۆمار و سەرۆك وەزیران و سەرۆكی پەرلەمان.
