SNN-
کێڵگەی گازی کۆرمۆر تەنیا بنکەیەکی ئابووری نییە، بەڵکو بڕبڕەی پشتی کارەبای هەرێمی کوردستانە و وەک گەورەترین کێڵگەی گازی لەسەر ئاستی عێراق و هەرێمی کوردستان دادەنرێت.
کۆرمۆر دەکەوێتە کوێ؟
کێڵگەی کۆرمۆر کە لە دوای ساڵی 2003ـەوە لەژێر دەسەڵاتی حکومەتی هەرێمی کوردستاندایە، تایبەتمەندییە جوگرافییەکەی بەم شێوەیەیە:
دەکەوێتە سنووری شارەدێی قادرکەرەم.
سەر بە شارۆچکەی چەمچەماڵە لە پارێزگای سلێمانی.
خاوەندارێتی و قەبارەی یەدەگەکەی
بەگوێرەی داتاکانی کۆمپانیای دانەغاز، زانیارییەکان لەبارەی وەبەرهێنان و قەبارەی کێڵگەکە بەم شێوەیەن:
وەبەرهێنەر: بە شێوەیەکی فەرمی کۆمپانیای دانەغازی ئیماراتی وەبەرهێنانی تێدا دەکات.
پشکەکان: 70%ـی پشکەکان تایبەتە بە دانەغاز و کۆمپانیای هیلالی ئیماراتی.
ڕووبەر: ڕووبەری کێڵگەکە دەگاتە 135 کیلۆمەتر چوارگۆشە.
یەدەگی گاز: یەدەگی گازی سروشتی لە کێڵگەکە بە نزیکەی 17 ترلیۆن پێ سێجا دەخەمڵێندرێت.
گرنگییەکەی بۆ کارەبا و ماڵان
کۆرمۆر ڕۆڵێکی گرنگی هەیە لە دابینکردنی وزە بۆ هاونیشتمانییان:
کارەبا: گازی کۆرمۆر بە بۆری ڕەوانەی وێستگەکانی کارەبای چەمچەماڵ و هەولێر دەکرێت و 67%ـی کارەبای هەرێمی کوردستان دابین دەکات.
توانای بەرهەمهێنان: توانای دابینکردنی گازی هەیە بۆ بەرهەمهێنانی چوار هەزار و 200 مێگاوات کارەبا.
غازی ماڵان: سەرچاوەی سەرەکییە بۆ دابینکردنی گاز بۆ کارگەکانی “غازی شل” کە بۆ غازی ماڵان بەکاردەهێنرێت.
