SNN نوێترین زانیاری لەبارەی ناردنی پارە و دابەشكردنی مووچەی مانگی 9 ئاشکرادەکات

عەلی حەمە سەعید-SNN

وەزارەتی دارایی عێراق دڵنیایی داوەتە بەرپرسانی وەزارەتی دارایی هەرێم كە لەسەرەتای هەفتەی داهاتوو دەستدەكەن بە ڕێكارەكانی ناردنی پارەی مووچەی مانگی 9ی فەرمانبەرانی هەرێم و تا كۆتایی هەفتە دابەشكردنی مووچە كۆتایی دێت.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، ئەمڕۆ پێنجشەممە بەرپرسانی باڵای وەزارەتی دارایی هەرێم پەیوەندییان بە وەزارەتی دارایی عێراق كردووە و داوای ڕوونكردنەوەیان كردووە لەبارەی هۆكاری دواكەوتنی ناردنی پارەی مووچەی مانگی نۆ لەكاتێكدا هەفتەیەك زیاترە هەرێم 120 ملیار دینارەكەی ناردووە.

ئاماژەی بەوەشكرد، لەوەڵامدا وەزارەتی دارایی عێراق دڵنیاییان داوەتە وەزارەتی دارایی هەرێم كە ئەمڕۆ كۆتایی بەدابەشكردنی مووچەی فەرمانبەرانی عێراق هاتووە و لەسەرەتای هەفتەی داهاتوو دەستدەكەن بە ڕێكارەكانی ناردنی پارەی مووچەی مانگی نۆی فەرمانبەرانی هەرێم كە بڕەكەی نزیكەی 960 ملیار دینارە.

ئەو بەرپرسەی وەزارەتی دارایی هەرێم ئەوەشی خستەڕوو، لەگەڵ گەیشتنی پارە لەسەرەتای هەفتەی داهاتوو دەستبەدابەشكردنی مووچە دەكرێت و تا كۆتایی هەفتە مووچەی سەرجەم وەزارەتەكان بۆ مانگی نۆ دابەشدەكرێت.