قوباد تاڵەبانی: میدیای نزیک لە پارتی بە نەفەسی شەڕی ناوخۆ کاردەکات

SNN

قوباد تاڵەبانی، جێگری سەرۆکی ئەنجوومەنی وەزیران، لە پەیامێکدا بە توندی ئیدانەی شێوازی ڕووماڵکردنی هەندێک کەناڵ و پەیجی سۆشیالمیدیای نزیک لە پارتی دیموکراتی کوردستانی کرد.

“نەفەسی شەڕی ناوخۆ”

لە پەیامەکەیدا، قوباد تاڵەبانی ڕایگەیاند: “بە توندی ئیدانەی شێوازی رووماڵکردنی کەناڵەکان و هەندێک سۆشیالمیدیای ئاراستەکراو و نزیک لە پارتی دەکەم کە چەواشەکارانە لەلایەکەوە باس لە یەکڕیزی دەکەن و لەلایەکی دیکەشەوە ڕێک بە نەفەسی سەردەمی شەڕی نەگریسی ناوخۆ کار بۆ تێکدانی ئاشتەوایی کۆمەڵایەتی و سیاسی دەکەن.”

داواکارییەک بۆ سپۆنسەرەکان

جێگری سەرۆکی ئەنجوومەنی وەزیران داوا لە سپۆنسەر و خاوەنی ئەو کەناڵانە دەکات و دەڵێت: “داوا لە سپۆنسەر و خاوەنەکانیان دەکەم لەپێناو بەرژەوەندیی گشتی و نیشتمانیدا کۆتایی بەم شێواز و گوتارە میدیاییە مەترسیدارە بهێنن و سنوورێکیان بۆ دابنێن.”

“ڕاستی وەک خۆر دەردەکەوێت”

لە کۆتایی پەیامەکەیدا، قوباد تاڵەبانی نووسیویەتی: “دڵنیابن ڕەنگە چەواشەکاری و میدیای پروپاگەندە بۆ ماوەیەک ڕاستییەکان لێڵ بکات، بەڵام دواجار ڕاستی وەک خۆری درەوشاوە خۆی نیشانی هەمووان دەدات.”