راگەیەندراوێکی توند لە وەزارەتی ناوخۆوە لەبارەی هێرشەکەی کۆرمۆر

SNN-
وەزارەتی ناوخۆی هەرێمی کوردستان رایگەیاند، هێرشەکەی دوێنێ شەو بۆ سەر کێڵگەی گازی کۆرمۆر دەرئەنجامی راستەوخۆی نەبوونی رێوشوێنی تووندە بەرامبەر بە ئەنجامدەرانی هێرشەکانی پێشوو.

وەزارەتی ناوخۆی ئاماژەی بەوەشکردووە، حکومەتی هەرێمی کوردستان مافی خۆیەتی هەموو ڕێوشوێنێکی پێویست بگرێتەبەر بۆ پاراستنی بەرژەوەندییە ئەمنی و ئابوورییەکانی، لە چوارچێوەی دەستوور و یاسادا.

ناوى هێرشکارانى ڕابردوو لاى سوودانییە

لە ڕاگەیەندراوەکەى وەزارەتى ناوخۆدا هاتووە، لە هاوینى ئەمساڵ و پاش هێرشە درۆنییەکان بۆسەر دامەزراوە نەوتییەکان، لیژنەیەکى باڵا بۆ لێکۆڵینەوە پێکهێنرا، لیژنەکە گەیشتنە ئەو ڕاستییەى لە ناوچەکانى ژێر دەسەڵاتى حکومەتى فیدراڵەوە درۆنەکان ئاڕاستە کراون، بەڵگەى فەرمى و دەقى دانپێدانانى ئەو کەسانە و سەرجەم زانیارییەکانى لێکۆڵینەوەکان بە ڕاپۆرتێک پێشکەشى سەرۆکوەزیران کران، بەڵام سەرەڕای تێپەڕبوونی زیاتر لە دوو مانگ بەسەر پێشکەشکردنی ڕاپۆرتەکە، حکومەتی فیدراڵ، هیچ ڕێوشوێنێکی یاسایی و ئەمنی بەرامبەر بە تاوانباران نەگرتووەتەبەر.

هیچ ڕێکارێک بەرامبەر بکەرانى هێرشەکان نەگیرانەبەر

وەزارەتى ناوخۆ دەشڵێت، ڕاپۆرتەکە چەندین ڕاسپاردەی لەخۆ گرتووە، دیارترینیان ئەنجامدانی کۆبوونەوەی ئەنجوومەنی ئاسایشی نیشتمانی بوو بۆ تاوتوێکردنی ڕاپۆرتەکە و گرتنەبەری ڕێوشوێنی یاسایی پێویست لە دژی لایەنی بەرپرسیار. بەڵام تاوەکو ئێستا هیچ کام لەم ڕاسپاردانە جێبەجێ نەکراون.

بێهەڵوێستی هانی ئەو ڕێکخراوانە دەدات بۆ درێژەدان بە کردەوەکانیان

هەر لە ڕاگەیەندراوەکەدا هاتووە، هەرێمی کوردستان جەخت دەکاتەوە بەردەوامبوونی بێهەڵوێستی بەرامبەر ئەو کەسانەی تێوەگلاون، کەمتەرخەمییە و هانی ئەو ڕێکخراوانە دەدات بۆ درێژەدان بە کردەوەکانیان و جەختدەکاتەوە، هێرشەکەى سەر کۆرمۆر لەو چوارچێوەیە بووە، بۆیە هەرێمى کوردستان مافى خۆیەتى ڕێوشوێنى پێویست و دەستوورى و یاسایی بگرێتەبەر.