SNN-
پڕۆسەی بەرهەمهێنانی غازی ماڵان لە کێڵگەی کۆرمۆر بەشێوەی ئەزموونی دەستیپێکردەوە و تانکەرەکان دەستیان بە گواستنەوەی غاز بۆ شارەکان کردووەتەوە.
دەستپێکردنەوەی بەرهەمهێنان بەشێوەی ئەزموونی
بەگوێرەی زانیارییەکان، لە کاتژمێر 09:00ـی بەیانیی ئەمڕۆوە تانکەرەکانی گواستنەوەی غازی ماڵان بانگکراونەتە ناو کێڵگەی کۆرمۆر و پڕۆسەکە بەشێوەی ئەزموونی دەستیپێکردووەتەوە. سەرەتا ژمارەیەک تانکەر پڕکراون و ڕەوانەی وێستگەی بانی مەقان کراون بۆ ئەوەی دواتر بەسەر شارەکاندا دابەش بکرێن.
“بە 55 خولەک تانکەرەکان پڕ دەکرێن”
شۆفێرێکی تانکەری گواستنەوەی غاز کە لەناو کێڵگەکە بووە ئاشکرای کرد، پڕکردنەوەی تانکەرەکەی تەنیا 55 خولەکی خایاندووە. بەگوتەی شۆفێرەکە “سەرەتا هەشت تانکەر بانگکراون، چواریان بەسەرکەوتوویی پڕکراون و چواری دیکەش لە پڕۆسەکەدان، دواتر بە شۆفێری دیکەش گوتراوە بچن غاز بار بکەن”.
کاریگەریی هێرشەکە و دڵنیایی وەزیر
دوای هێرشە مووشەکی و درۆنییەکەی شەوی 26 لەسەر 27ـی تشرینی دووەم، ماوەی دوو ڕۆژ بەرهەمهێنان لە کێڵگەکە وەستا. هەرچەندە هێشتا وادەی دەستپێکردنەوەی بەرهەمهێنانی غاز بۆ وێستگەکانی کارەبا دیار نییە، بەڵام وەزیری کارەبا و سامانە سروشتییەکان بە وەکاڵەت دڵنیایی داوە کە “غازی ماڵان کێشەی بۆ دروست نابێت و گران نابێت”.
