SNN-
گرژی و ئاڵۆزییەکانی گوندی لاجان سنوورە لۆکاڵییەکانی تێپەڕاند و لە میدیا جیهانییەکان دەنگی دایەوە. ئاژانسی ڕۆیتەرز وردەکاریی ڕووداوەکە بڵاودەکاتەوە و هۆکاری کوژرانی قوربانییەکان ئاشکرا دەکات.
“تەقەکردن بەشێوەی هەڕەمەکی”
ئاژانسی هەواڵی ڕۆیتەرز لە زاری سەرچاوە ئەمنییەکانەوە بڵاویکردووەتەوە، لەکاتێکدا خۆپیشاندەران لەبەردەم پاڵاوگەی لاناز داوای هەلی کاریان دەکرد، هێزە ئەمنییەکان کە ئەرکیان پاسەوانیکردنی ناوچەکە بووە، “بەشێوەیەکی هەڕەمەکی دەستیان بە تەقەکردن کردووە بەناو خۆپیشاندەراندا”.
شۆفێرێکی بێلایەن کوژراوە
بەگوێرەی ڕاپۆرتەکە، دەرەنجامی تەقەکردنە هەڕەمەکییەکە بووەتە هۆی کوژرانی خۆپیشاندەرێک و شۆفێرێکی تانکەری گواستنەوەی نەوت، کە ئاماژە کراوە بەوەی “هیچ پەیوەندییەکی بە خۆپیشاندانەکانەوە نەبووە”.
قوربانییەکان
ئاژانسەکە پشت بە سەرچاوە پزیشکییەکانیش دەبەستێت و ئاماژە بەوە دەکات، بەهۆی ئاڵۆزییەکانی نێوان هێزەکانی ئاسایش و خۆپیشاندەران لە گوندی لاجانی سەر بە پارێزگای هەولێر، لانیکەم کەسێک کوژراوە و سێ کەسی دیکەش بریندار بوون.
