SNN-
سەرەڕای تێپەڕبوونی زیاتر لە 15 کاتژمێر بەسەر گرژییەکانی گوندی لاجان، هێشتا گەمارۆی ئەمنی لەسەر گوندەکە کەمینەکردووە و هێزێکی زۆری ئاسایش و سەربازی لەناوچەکە ماونەتەوە.
هێزی سەربازی و دۆشکە ماون
بەگوێرەی زانیارییەکان، بازگە سەربازییەکان لە شوێنی خۆیان ماون و پشکنینی ورد بۆ ئەو کەسانە دەکەن کە دەچنە نێو گوندەکەوە، پرسیاری بوونی چەکیان لێ دەکرێت. هاوکات ئەو ئۆتۆمبێلە سەربازییانەی چەکی دۆشکەیان لەسەرە، هێشتا لە گوندەکە نەکشاونەتەوە و بڵاوەیان پێ کراوە.
دەستگیرکردن بەبێ بڕیاری دادوەر
دانیشتووانی گوندەکە ئاماژە بەوە دەکەن، ئەو کەسانەی دەستگیرکراون “هیچ بڕیارێکی دادوەریان نییە و تۆمەتیان لەسەر نییە”، هاوکات فەرمانی دەستگیرکردن بۆ بریندارەکانیش دەرچووە. هێزە ئەمنییەکان هۆشدارییان داوە کە “هەرکەسێک ئامادە نەبێت داواکراوەکان ڕادەست بکات، ئەویش دەستگیر دەکرێت”.
“لە خاکی خۆمان زوڵممان لێ دەکرێت”
دانیشتووانی گوندەکە کە لەڕووی دەروونییەوە ماندوون، و دەڵێن: “لەسەر خاکی خۆمان زوڵم و دەستدرێژیمان لێ دەکرێت”. دۆخەکە بەجۆرێکە ترس و دڵەڕاوکێ باڵی بەسەر گوندەکەدا کێشاوە.
