دۆخی لاجان ئاڵۆزە.. فەرمانی دەستگیرکردن بۆ 30 کەس دەرچووە و هێزەکان ناکشێنەوە

SNN-

هێزێکی ئەمنیی زۆر گەمارۆی گوندی لاجانی داوە و ڕەتیدەکەنەوە تاوەکو دەستگیرکردنی سەرجەم داواکراوەکان ناوچەکە چۆڵ بکەن، هەوڵەکان بۆ هێورکردنەوەی دۆخەکەش شکستیان هێناوە.

فەرمانی دەستگیرکردن بۆ 30 کەس

بەگوێرەی زانیارییەکان، دوای دەستگیرکردنی پێنج گەنج لە ئێوارەی ڕۆژی شەممەدا، فەرمانی دەستگیرکردن بۆ 30 کەسی دیکەی گوندەکە دەرچووە. ئەم کەسانە لەڕێگەی کامێراکانی چاودێرییەوە ناسێنراون و تۆمەتی بەشداریکردنیان لە گردبوونەوەکەی بەردەم پاڵاوگەی لاناز ئاراستە کراوە.

کۆبوونەوەی پارێزگا بێئەنجام بوو

سەرچاوەیەکی ئاگادار ئاشکرای کرد، دوێنێ یەکشەممە لە دیوانی پارێزگای هەولێر کۆبوونەوەیەک لەنێوان نوێنەران و ڕیش‌سپییانی لاجان لەگەڵ ئاسایش بەڕێوەچوو بۆ هێورکردنەوەی دۆخەکە، بەڵام کۆبوونەوەکە “بێئەنجام بووە”، چونکە بەرپرسانی ئاسایش سووربوون لەسەر وەرگرتنی چەک لە دانیشتووان و دەستگیرکردنی داواکراوەکان.

مەرجی کشانەوەی هێزەکان

سەرەڕای ئەوەی 50 بۆ 60 کەس لە دانیشتووانی گوندەکە چەکەکانیان ڕادەست کردووە بۆ ئەوەی دەستگیرکراوەکان ئازاد بکرێن، بەڵام هێزە ئەمنییەکان هێشتا لە چواردەوری گوندەکە جێگیرن و ڕەتیدەکەنەوە بکشێنەوە تاوەکو سەرجەم ئەو کەسانەی فەرمانی دەستگیرکردنیان هەیە، دەستگیر نەکرێن.