کۆمپانیای دانەغاز لەبارەی بەرهەمهێنانی غازەوە روونکردنەوە دەدات

SNN

کۆمپانیای دانەغاز رایگەیاند، بەرهەمهێنانی غاز لە کێڵگەی کۆرمۆر ئاسایی بووەتەوە، ئەمەش دوای ئەو هێرشەی کرایە سەر کێڵگەکە و بۆ ماوەیەک بەرهەمهێنانی غاز و کارەبای راگرت.

ئەمڕۆ چوارشەممە 3ی کانوونی یەکەم، کۆمپانیای دانەغاز لە راگەیەنراوێکدا ئاشکرایکردووە، دوای تووندکردنی رێوشوێنە ئەمنییەکان لەلایەن حکومەتی هەرێمی کوردستان و دەسەڵاتە فیدراڵییەکان، بەرهەمهێنانی غازیان دەستپێکردووەتەوە.

ئاماژەی بەوەکردووە، لەگەڵ هاوبەشەکانیان پابەندن بە سەلامەتیی کارمەندانیان و دابینکردنی کارەبا و غازی ئێڵ پی جی بۆ خەڵکی هەرێمی کوردستان و عێراق.

ئەمەش دوای هێرشەکەی رۆژی چوارشەممەی رابردووی سەر کۆرمۆر بووە، کە بەهۆیەوە ئاگر لە کۆگایەکی سەرەکی کەوتەوە و لە ئەنجامدا بەرهەمهێنانی رۆژانەی 750 ملیۆن پێ سێجا غاز راوەستا، ئەمەش بووە هۆی لەدەستدانی نزیکەی 80%ی بەرهەمهێنانی کارەبای هەرێمی کوردستان.

هاوکات، رۆژی یەکشەممە 30-11-2025 وەزارەتی کارەبای حکومەتی هەرێمی کوردستان لە راگەیەنراوێکدا جەختیکردەوە، کارەبای نیشتیمانی گەڕاوەتەوە دۆخی ئاسایی و کارەبای 24 کاتژمێری ئاسایی بووەتەوە.