هێڵی ئاسمانی “جێت ئەی” گەشتەکانی بۆ سلێمانی دەستپێکرد؛ هەفتانە چوار گەشت دەکات

دوای مانگێک لە دەستپێکردنەوەی گەشتەکانی تورکیش ئێرلاین، ئەمڕۆ هێڵێکی دیکەی ئاسمانی تورکیا گەشتەکانی بۆ فڕۆکەخانەی نێودەوڵەتی سلێمانی دەستپێکرد و جموجۆڵی بازرگانی و گەشتیاری فراوانتر دەبێت.

وردەکاریی گەشتەکانی “جێت ئەی”

بەرەبەیانی ئەمڕۆ سێشەممە، هێڵی ئاسمانی “جێت ئەی” (Jet A) یەکەمین گەشتی خۆی بۆ فڕۆکەخانەی نێودەوڵەتی سلێمانی ئەنجامدا.

بەگوێرەی ڕاگەیێنراوی فڕۆکەخانەکە، ئەم هەنگاوە لە چوارچێوەی فراوانکردنی گەشتە ئاسمانییەکانە و بڕیارە هەفتانە چوار گەشت لەنێوان (ئیستەنبوڵ – سلێمانی – ئیستەنبوڵ) لەڕێگەی ئەم هێڵەوە ئەنجام بدرێت.

کۆتاییهاتنی گەمارۆی دوو ساڵە

دەستپێکردنی ئەم گەشتانە دوای ئەوە دێت کە ڕۆژی 3ی تشرینی دووەمی 2025، دوای دوو ساڵ و حەوت مانگ لە گەمارۆی ئاسمانی، یەکەمین فڕۆکەی هێڵی ئاسمانیی تورکیا (تورکیش ئێرلاین) لە سلێمانی نیشتەوە.

لە یەکەم گەشتی تورکیش ئێرلایندا، 105 سەرنشین هاتنە سلێمانی و 123 گەشتیاریش بەرەو ئیستەنبوڵ بەڕێکەوتن، کە ئێستا ئەو هێڵەش هاوشێوەی “جێت ئەی” هەفتانە چوار گەشت ئەنجام دەدات.

زیانەکانی گەمارۆی تورکیا بە ژمارە

گەمارۆی ئاسمانیی تورکیا بۆ سەر فڕۆکەخانەی سلێمانی لە نیسانی 2023ـەوە دەستی پێکردبوو، زیان و کاریگەرییەکانی بەمشێوەیە بوون:

ڕاگرتنی %35ی کۆی گەشتەکانی فڕۆکەخانەی سلێمانی.

زیان گەیاندن بە ئابووریی فڕۆکەخانەکە بە بڕی زیاتر لە شەش ملیۆن دۆلار.

بەهۆی دەستپێکردنەوەی گەشتەکان، پێشبینی دەکرێت کەرتی گەشتیاری و بازرگانی بووژانەوە بەخۆیەوە ببینێت.