قوباد تاڵەبانی: ئامادەین بۆ پێکهێنانی حکومەت لەسەر بنەمای “هاوسەنگی و هاوبەشی”

SNN

جێگری سەرۆکوەزیران لەگەڵ جێگری وەزیری دەرەوەی ئەمریکا کۆبووەوە و پەیامی خۆیان لەبارەی شێوازی پێکهێنانی کابینەی داهاتوو، هێرشەکانی سەر کۆرمۆر و چاکسازیی پێشمەرگە گەیاندە ئەمریکییەکان.

کردنەوەی کونسوڵخانە و کرانەوەی دەرگای هەرێم

ڕۆژی چوارشەممە 3ی کانوونی یەکەمی 2025، قوباد تاڵەبانی پێشوازی لە مایکڵ ڕیگاس کرد و پیرۆزبایی کردنەوەی گەورەترین کونسوڵخانەی ئەمریکای لێکرد.

تاڵەبانی ڕایگەیاند، دەرگای هەموو شار و ناوچەکانی کوردستان کراوەیە بەڕووی ئەمریکادا بۆ بەهێزترکردنی پەیوەندییەکان لە بوارەکانی ئەمنی، ئابووری، بازرگانی و کولتووریدا.

پێویستیی زیاتری هەماهەنگی دژی هێرشەکان

سەبارەت بە هێرشکردنە سەر کێڵگەی غازی کۆرمۆر، هەردوولا هاوڕا بوون کە ئەمە “هێرشی تیرۆریستییە” بۆ سەر ژێرخانی وزە.

قوباد تاڵەبانی جەختی کردەوە، بەردەوامی و چەندبارەبوونەوەی هێرشەکان سەلمێنەری ئەوەیە کە پێویستە ئاستی هەماهەنگیی نێوان هەرێم و ئەمریکا بەردەوام و زیاتر بێت بۆ کۆتاییهێنان بەم دۆخە.

مەرجەکانی پێکهێنانی حکومەتی نوێ

لەبارەی پرسی پێکهێنانی کابینەی نوێی حکومەتی هەرێم، قوباد تاڵەبانی بۆ شاندە ئەمریکییەکەی ڕوونکردەوە و گوتی: “ئامادەین بۆ پێکهێنانی حکومەت لەسەر بنەمای (هاوسەنگی و هاوبەشیی ڕاستەقینە) کە بەبێ جیاوازی خزمەتی هەموو هاووڵاتییان و ناوچەکان بکات.”

دوورخستنەوەی دەستی حیزب لە هێزی پێشمەرگە

لە تەوەرێکی دیکەدا باس لە چاکسازییەکانی وەزارەتی پێشمەرگە کرا و جێگری سەرۆکوەزیران ڕایگەیاند، پڕۆسەکە قۆناغی باشی بڕیوە.

تاڵەبانی سوپاسی ئەمریکای کرد و جەختی کردەوە کە پڕۆسەکە بەردەوام دەبێت تا ئەو کاتەی دەبنە خاوەنی هێزێکی ڕاهێنراوی نیشتمانی و “دوور لە هەر چەشنە دەستێوەردان و ئینتمایەکی حیزبی.”