لەتیف نێروەیی: لەجیاتی پارێزگاری هەولێر بوومایە، 10 جار داوای لێبوردنم دەکرد

SNN

لەتیف نێروەیی، لە نووسینێکدا بەناونیشانی “گەر لەجیاتی پارێزگاری هەولێر بومایە؟”، بە وردی باس لەو هەنگاوانە دەکات کە پێیوابوو دەبوو لەلایەن پارێزگاری هەولێرەوە بگیرێنەبەر دوای ڕووداوەکانی گوندی لاجان. نێروەیی جەخت لەسەر پێویستیی داوای لێبوردن لە قوربانیان و خەڵکی ناوچەکە دەکاتەوە.

داوای لێبوردن لە قوربانیان

نێروەیی دەنووسێت، ئەگەر ئەو پارێزگار بووایە، سەردانی شەیما ئەحمەد، کچە پەیامنێری کەناڵ8ـی دەکرد و چوار جار داوای لێبوردنی لێدەکرد: یەکەم بۆ پەلاماردانی لەلایەن چوار پیاوەوە، دووەم بۆ ئەوەی توندوتیژییەکە لە ڕۆژانی بەرەنگاربوونەوەی توندوتیژی دژی ژناندا ڕوویداوە، سێیەم بۆ پێشێلکردنی ئازادیی ڕۆژنامەوانی، و چوارەمیش بۆ بێڕێزیکردن بە کاری میدیایی.

هەروەها دەڵێت، سەردانی ئەو هاوڵاتییە خاوەن پێداویستییە تایبەتەی دەکرد کە بەناچاری ئاوارە کرابوو، سەردانی خێزانی ئەو منداڵە ساوایەی دەکرد کە لە سەرماکەدا دەگریا، و داوای لێبوردنی لە سەرجەم منداڵانی گوندەکە دەکرد کە لە خوێندن دابڕاون.

داننان بە که‌مته‌رخه‌میدا

لەتیف نێروەیی جەخت لەوە دەکاتەوە کە دەبوو سەردانی گەنجە دەستگیرکراوەکانی گوندەکە بکرایە و بەهۆی کەمتەرخەمییەوە داوای لێبوردنیان لێبکرایە و ئازاد بکرانایە.

لە کۆتاییدا، ئاماژەی بەوە کردووە کە دەبوو داوای لێبوردن لە خەڵکی هەولێر بکرایە و پێیان بوترایە کە کێشەکە تەنها داواکردنی هەلی کار بووە و پەیوەندی بە دەستی دەرەکییەوە نەبووە، بەڵام بەهۆی کەمتەرخەمیی ئیدارییەوە، “بژاردەی هێز بوو بە تاکە بژاردە و خوێنێکی زۆر بە ناهەق ڕژا.”