بەهاى تمەنى ئێرانى دابەزی؛ 100 دۆلار لە 13 ملیۆن نزیکبووەوە

SNN

بەهای تمەنی ئێرانی بەرامبەر دۆلار و دینار دابەزینێکی مێژوویی دیکەى تۆمار کرد و تەنیا لە ماوەی ئەمساڵدا نزیکەی نیوەی بەهاکەی لەدەستداوە.

بەهای دۆلار و دینار بەرامبەر تمەن
بەگوێرەی زانیارییەکانی دانا مەولود، مامەڵەکارى دراو لە بازاڕی دۆلارەکەی سلێمانی، نرخی تمەن تووشی شۆکێکی دیکە بووە و نرخەکان بەم شێوەیەن:
100 دۆلار (حەواڵە): 12 ملیۆن و 680 هەزار تمەن.
100 دۆلار (کاش): 12 ملیۆن و 400 هەزار تمەن.
100 هەزار تمەن: هەزار و 100 دیناری عێراقی.
لەدەستدانی 40%ـی بەهاکەی
بەراوردکارییەکان دەریدەخەن کە تمەن تەنیا لە ساڵی 2025ـدا نزیکەى 40%ـی بەهاکەی لەدەستداوە.

لە سەرەتای ئەمساڵدا بەهای 100 دۆلار حەوت ملیۆن و 500 هەزار تمەن بوو، بەڵام ئێستا کە لە هەفتەى دووەمى کانوونی یەکەمداین، بڕی پێنج ملیۆن و 180 هەزار تمەن چووەتە سەر نرخەکەی.

هۆکاری داڕمانی ئابووریی ئێران
شارەزایانی ئابووری هۆکاری سەرەکیی ئەم داڕمانە خێرایە بۆ کاراکردنی سزاکانی ناسراو بە “سناپ باک” دەگەڕێننەوە.
ڕۆژی 28ـی ئەیلول، وڵاتانی فەڕەنسا، بەریتانیا و ئەڵمانیا سزاکانی پێش ساڵی 2015ـی ئەنجوومەنى ئاسایشیان بۆسەر ئێران گەڕاندەوە، ئەمەش گورزێکی کوشندەی لە بەهای دراوی ئەو وڵاتە وەشاند.