دارایی هەرێمی کوردستان وادەی ناردنی لیستی مووچەی مانگى 12ـی دیاری کرد

SNN-

وەزارەتى دارایی وادەی کۆتایی بۆ ئامادەکردنی لیستی مووچەی کۆتایی ساڵ دیاری دەکات و هۆشداری دەداتە فەرمانگەکان بۆ ئەوەی پێش داخستنی هەژمارەکان لە عێراق، لیستەکە بگاتە بەغدا.

سیستمى پەیڕۆڵ کارا کرا

یادگار جەبار، سەرپەشتیارى بایۆمەترى سلێمانى  ڕایگەیاند، ئەمڕۆ سێشەممە 9ـى کانوونى یەکەمى 2025 سیستمى پەیڕۆڵ بۆ ئامادەکردنى لیستى مووچەى مانگى 12 کارا کراوە.

ناوبراو ئاماژەی بەوەش کرد، وەزارەتى دارایی مۆڵەتی تەنیا “یەک هەفتە”ـی بە یەکە ژمێریارییەکان داوە بۆ تەواوکردن و ناردنی لیستەکان.

پێش 25ـی مانگ لیستەکە دەچێتە بەغدا

بەگوێرەی زانیارییەکان، ئامانج لەم پەلەکردنە ئەوەیە پێش 20ـى کانوونى یەکەم لیستەکە ڕەوانەى بەغداد بکرێت، تاوەکو پێش 25ـى مانگ کە وادەی ڕاگرتنی خەرجییە داراییەکانە لە عێراق، وردبینییەکە تەواو ببێت.

خانەنشینانی سەربازی لیستەکەیان ناردووە

بەڕێوەبەرایەتى خانەنشینى سەربازى سلێمانى پێشوەختە لیستى مووچەى مانگى 12ـیان ڕەوانەى وەزارەتى دارایی کردووە. یادگار جەبار لەوبارەیەوە ڕوونیکردەوە: “لیستى خانەنشینانی سەربازی جیایە و لە سیستمى پەیڕۆڵدا نییە.”

چارەنووسی مووچەکانی 10 و 11

هاوکات لەگەڵ ئامادەکارییەکان بۆ مانگی 12، دۆخی مووچەکانی دیکە بەم شێوەیەیە:

لیستى مووچەى مانگى 10 لە بەغداد پەسەند کراوە.

بڕیارە لە کۆتایی ئەم هەفتەیەدا لیستى مووچەى مانگى 11 پەسەند بکرێت.