بافڵ جەلال تاڵەبانی: هاوسۆز و هاوخەمی قوربانیانی لافاوەکەی چەمچەماڵ و شوێنەکانی ترم
بافڵ جەلال تاڵەبانی، سەرۆکی یەکێتیی نیشتمانی کوردستان لە ڕاگەیەندراوێکدا، هاوسۆزی و هاوخەمی خۆی بۆ قوربانیانی لافاوەکەی چەمچەماڵ و سنووری کەرکوک و ناوچەکانی دیکەی کوردستان خواست.
هاوسۆزی و هاوخەمی بۆ کەسوکاری قوربانییەکان
لە پەیامەکەیدا سەرۆکی یەکێتی هاتووە “هاوسۆزی و هاوخەمی کەسوکاری قوربانییانی لافاوەکەی چەمچەماڵ و سنووری کەرکوک و ناوچەکانی دیکەی کوردستانم و هیوای چاکبوونەوەی خێرا بۆ بریندارەکان دەخوازم “.
تەواوی دامودەزگا و ئۆرگانەکانمان ڕاسپاردووە خزمەتی هاوڵاتیان بکەن
لە بەشێکی دیکەی ڕاگەیەندراوەکەی سەرۆکی یەکێتی دەڵێت “ئێمە لە یەکێتیی نیشتمانیی کوردستان تەواوی دامودەزگا و ئۆرگانەکانمان راسپاردووە لەگەڵ خەڵکی هەرێمی کوردستان و دامەزراوە ئیدارییەکان بن و خزمەتی هاوڵاتییان بکەن. سوپاس و دەستخۆشی بێپایانیش ئاڕاستەی تیمەکانی فریاگوزاری و هێزە ئەمنییەکان دەکەم کە هاریکاریی تەواوی خەڵکە خۆشەویستەکەمان بوون.
