سودانی: پارەی فریاگوزاری و هاوکاریی بەپەلە بۆ هەرێمی کوردستان بنێردرێت

SNN-

سەرۆکوەزیرانی عێراق بەدەنگ زیانلێکەوتووانی لافاوەکەی هەرێمی کوردستانەوە دێت و فەرمان دەکات دەستبەجێ بودجەی فریاگوزاری تەرخان بکرێت و تیمەکان بنێردرێن.

پارەی فریاگوزاری تەرخان دەکرێت

بەگوێرەی ڕاگەیێنراوی نووسینگەی ڕاگەیاندنی سەرۆکوەزیران، محەمەد شیاع سودانی وەزارەتی دارایی عێراقی ڕاسپاردووە “پارەی فریاگوزاری” تەرخان بکات، بەمەبەستی دابینکردنی هەموو پێداویستییەکی پێویست بۆ هاونیشتمانییان لە هەرێمی کوردستان.

ناوەندی قەیرانەکان خرایە ئامادەباشییەوە

هاوکات سەرۆکوەزیرانی عێراق، ناوەندی نیشتمانی بۆ بەڕێوەبردنی قەیران و کارەساتەکانی لە وەزارەتی ناوخۆ و لایەنە پەیوەندیدارەکان ڕاسپاردووە، بۆ ئەوەی بەپەلە هاوکاری و پاڵپشتیی لۆجستی پێشکەش بە ناوچە زیانلێکەوتووەکان بکەن.

بەدەنگەوەهاتنی بەغدا

ئەم بڕیارانەی سودانی وەک پەرچەکردارێکە دوابەدوای ئەو بارودۆخە سەختەی کەشوهەوا، کە بووە هۆی دروستبوونی شەپۆلێکی بەهێزی لافاو لە ناوچە جیاوازەکانی هەرێمی کوردستان و زیانی گیانی و ماددی لێکەوتەوە.