وەزیری خوێندنی باڵا: کرێی خوێندنی ئەمساڵ لە خوێندکارانی چەمچەماڵ وەرناگیرێت
SNN
دکتۆر ئارام محەمەد قادر، وەزیری خوێندنی باڵا و توێژینەوەی زانستی، لە بڕیارێکی گرنگدا، لێخۆشبوونی لە کرێی خوێندنی ساڵی (2025-2026) بۆ سەرجەم خوێندکارانی دانیشتووی قەزای چەمچەماڵ و دەوروبەری دەرکرد. بڕیارەکە وەک هاوخەمییەک دێت بۆ ئەو کارەساتە سروشتییەی ڕووی لە ناوچەکە کردووە.
لێخۆشبوونەکە کێ دەگرێتەوە؟
بەپێی بڕیارەکە، لێخۆشبوونەکە سەرجەم ئەو قوتابی و خوێندکارانە دەگرێتەوە کە دانیشتووی قەزای چەمچەماڵ و ناوچە زیانلێکەوتووەکانی دەوروبەرین و لە خوێندنی پارالێل یان ئێواران لە قۆناغەکانی (دبلۆم، بەکالۆریۆس، دبلۆمی باڵا، ماستەر و دکتۆرا) لە سەرجەم زانکۆکانی هەرێمدا وەرگیراون.
مەرجی سودمەندبوون
وەزارەتی خوێندنی باڵا ئاماژەی بەوەشکردووە، پێویستە خوێندکاران و قوتابیان بە دیکۆمێنتی فەرمی و یاسایی بیسەلمێنن کە دانیشتووی قەزای چەمچەماڵ یان ئەو شوێنانەن کە زیانیان بەرکەوتووە، تاوەکو بڕیاری لێخۆشبوونەکە بیانگرێتەوە.
