کاندیدی سوننەکان بۆ سەرۆکی ئەنجومەنی نوێنەرانی عێراق دیاریدەکرێت

SNN-

ئەنجومەنی سیاسیی نیشتمانیی سوننەکان کۆدەبێتەوە و بڕیار لەبارەی کاندیدی پۆستی سەرۆکی ئەنجومەنی نوێنەران دەدات.

رۆژنامەی سەباحی نیمچە رەسمیی عێراق بڵاویکردەوە، بڕیارە ئەمڕۆ یەکشەممە، ئەنجومەنی سیاسیی نیشتمانیی حزبە سونییەکان کۆبوونەوەیەکی چارەنووسساز بۆ دیاریکردنی کاندیدی سەرۆکی ئەنجومەنی نوێنەرانی عێراق، ئەنجامبدات.

سەڵاح مەرعاوی، ئەندامی هاوپەیمانیی عەزم بە رۆژنامەکەی راگەیاندووە، کۆبوونەوەکە لە بارەگای موسەننا سامەرائی، سەرۆکی هاوپەیمانێتییەکە ئەنجامدەدرێت، ئامانج لێی ئەوەیە کاندیدێک یان دووان بۆ پۆستی سەرۆکی ئەنجومەنی نوێنەران دیاریبکرێت.

باسی لەوەشکردووە، گفتوگۆکان لەنێو هەر پێنج لایەنی سوننی هاوپەیمانێتییەکە بەردەوامە، بەڵام تاوەکو ئێستا هیچ ناوێک بۆ کاندید دەستنیشاننەکراوە.
بەپێی عورفی سیاسی لە عێراق، پۆستی سەرۆکی ئەنجومەنی نوێنەرانی عێراق پشکی لایەنە سونییەکانە و پێویستە ئەوان کاندید بۆ ئەو پۆستە دەستنیشانبکەن و دواتر لە ئەنجومەنی نوێنەران دەنگی پێبدرێت.