لە مێرگەپان غازی سۆپا کۆتایی بە ژیانی دوو هاووڵاتیی عەرەب هێنا

SNN

شەوی ڕابردوو 19ـی کانونی یەکەمی 2025 لە ناوچەی گەشتیاریی مێرگەپان لە سنووری پارێزگای سلێمانی، ڕووداوێکی غازی زۆپا کە بەهۆیەوە دوو هاووڵاتیی نەتەوەی عەرەب گیانیان لەدەستدا.

بەگوێرەی زانیارییەکانی کەناڵ8، ئەو دوو هاووڵاتییە دوێنێ هەینی باخێکیان لە ناوچەی مێرگەپان کڕیوە. بڕیاریان دابوو بۆ یەکەمجار و لەم شەودا لەناو باخە نوێیەکەیاندا بمێننەوە، بەڵام چارەنووس ڕێگەی نەدا چێژ لە موڵکە نوێیەکەیان ببینن.

زانیارییە سەرەتاییەکان ئاماژە بەوە دەکەن کە هۆکاری مردنی ئەو دوو هاووڵاتییە “غازی سۆپا” بووە و لەکاتی خەودا خنکاون. قوربانییەکان هەردووکیان پیاون و تەمەنیان بەم شێوەیەیە:
یەکێکیان تەمەنی 24 ساڵە.
ئەوی دیکەیان تەمەنی 35 ساڵە.

دوای ئاگادارکردنەوەی لایەنە پەیوەندیدارەکان و گەیشتنی تیمەکانی پۆلیس و فریاگوزاری، تەرمەکان گواستراونەتەوە بۆ پەیمانگەی پزیشکیی دادی سلێمانی، بەمەبەستی ئەنجامدانی توێکاری و تەواوکردنی ڕێکارە یاساییەکان.