زێڕ گەیشتەوە یەک ملیۆن دینار؛ لە ڕۆژێکدا 12 هەزار بەرزبووەوە

SNN-

لەگەڵ کردنەوەی بازاڕە داراییەکان، نرخی زێڕ و زیو بەرزترین پێوانەی مێژووییان تۆمار کرد و لە بازاڕەکانی عێراق و هەرێمی کوردستان جارێکی دیکە بەربەستەکان شکێنران و نرخی یەک مسقاڵ زێڕی عەیار 24 گەیشتەوە 1,000,000 دینار.

بازدانی نرخەکان لە بازاڕی ناوخۆ

لە بازاڕی زێڕەنگەرانی عێراق و هەرێمی کوردستان، نرخی زێڕ بازدانێکی گەورەی بەخۆیەوە بینیوە و لە ماوەی تەنیا یەک ڕۆژدا هەر مسقاڵێک 12,000 دینار چووەتە سەر نرخەکەی. لە ئێستادا مسقاڵێک زێڕی عەیار 24 بە 1,000,000 دینار، عەیار 21 بە 891,000 دینار و عەیار 18 بە 763,000 دینار مامەڵەی پێوە دەکرێت و پێشبینی بەرزبوونەوەی زیاتریش دەکرێت.

هەڵکشانی زێڕ و زیو لە جیهاندا

لەسەر ئاستی جیهان، نرخی یەک ئۆنسە زێڕ بەراورد بە ڕۆژی ڕابردوو 80 دۆلار بەرزبووەتەوە و گەیشتووەتە 4,484 دۆلار. هاوکات نرخی یەک ئۆنسە زیو لە بازاڕەکاندا بە 69 دۆلار و 60 سەنت مامەڵەی پێوە دەکرێت، ئەمەش بەرزترین ئاستی مێژووییە بۆ کانزاکان کە لەم دوو ڕۆژەدا تۆمار کراوە.

نرخی زیو و لیرە لە کوردستان

هاوتەریب لەگەڵ زێڕ، نرخی لیرە و کانزاکانی دیکەش بەرزبوونەتەوە؛ نرخی یەک لیرەی خلیجی گەیشتووەتە 921 دۆلار و یەک کیلۆ زیویش لە جۆری مەڕمەڕ لە بازاڕەکانی هەرێمی کوردستاندا بە 2,275 دۆلار دەفرۆشرێت، لەکاتێکدا نرخی کیلۆیەک زیو لە بۆرسەی جیهانی بە 2,212 دۆلارە.

گرژییەکان و سوودی بانکی

شارەزایان هۆکاری ئەم شەپۆلە نوێیەی بەرزبوونەوەکان بۆ زیادبوونی گرژییە سیاسییەکانی نێوان ئەمریکا و ڤەنزوێلا دەگەڕێننەوە، جگە لەوەی پێشبینییەکانی کەمکردنەوەی ڕێژەی سوودی بانکی لەلایەن بانکی فیدراڵیی ئەمریکاوە لە ساڵی نوێدا، پاڵپشتییەکی بەهێزی بۆ بەرزبوونەوەی بەهای کانزاکان دروست کردووە.