عەلی حەمە ساڵح: نوسراوەکەی وەزارەتی دارایی بۆ پلەبەرزکردنەوە نییە
SNN
عەلی حەمە ساڵح لەبارەی پلەبەرزکردنەوەی فەرمانبەرانەوە رایگەیاند، نوسراوەکەی وەزارەتی دارایی بڕیاری پلەبەرزکردنەوە نییە هەروەک بۆ هەڵوەشاندنەوە و راگرتنی نییە.
ئەمڕۆ سێشەممە 23ی کانوونی یەکەم، عەلی حەمە ساڵح لە نوێترین بڵاوکراوەیدا لە هەژمارەکانی خۆی لە سۆشیاڵ میدیا رایگەیاندووە، نوسراوەکەی وەزارەتی دارایی بڕیاری پلەبەرزکردنەوە نییە، هەڵوەشاندنەوەی بڕیارەکانی پێشووتریش نییە بۆ ڕاگرتنی پلە بەرزکردنەوە کردویانە، پلە بەرزکردنەوەی هێزی ئەمنی و سەربارزی ڕانەگیراوە، تا بکرێتەوە، کەواتە ئەم بڕیارە بۆ چییە؟
ئاشکرایکردووە، “بۆ ئەوەیە بڕی پارەی پێویستی تەرخانکراو بزاندرێت لە ئەگەری دەستپێکردنەوەدا، چونکە بەپێی ئەو ڕێککەوتنەی کراوە بۆ هەناردەی نەوت و ناردنی داهات و هاتنی مووچە، بەم شێوەی ئێستا بەردەوام دەبێت تاکاتی پەسەندکردنی بودجەی ٢٠٢٦، کە پێموایە دوا دەکەوێت بۆ دوای (مانگی پێنج)”.
ئاماژە بەوەدەکات، ئەرکی هەمووانە ئەو کات کاربکەن بۆ هاوتاکردنی مووچەی فەرمانبەران و خانەنشینان بە هاوتاکانیان لە عێراق، دەستپێکردنی پلە بەرزکردنەوە خاڵێکی سەرەکی بێت.
لە کۆتایدا عەلی حەمە ساڵح دەڵێت “ئەگەر بڕیاری پلەبەرزکردنەوە درابا؛ دەکرایە دەستکەوت بۆ مەسرور بارزانی و چەندین کۆنگرە و ڕاپۆرتی لەسەر دەکرا! نەک نوسراوێکی بێدەنگی وەزارەتی دارایی”.
