لە كابینەی نۆی حكومەتی هەرێم، 13مووچە دابەشنەكراون و 10مووچەش بەلێبڕینەوە دابەشكراون
مووچە لە کابینەی نۆدا
عەلی حەمە سەعید-SNN
لە گەڵ دەستبەكاربوونی كابینەی نۆی حكومەتی هەرێم بە سەرۆكایەتی مەسرور بارزانی، كە تا ئێستاش بەردەوامی هەیە و ماوەی شەش ساڵ و شەش مانگ تەمەنی كابینەكەیەتی، تا ئێستا 13 مووچە بەتەواوی دابەشنەكراون و 10 مووچەش بەلێبڕینی لە%18 و %21 دابەشكراون.
بەگوێرەی بەدواداچوونەكانی SNNلەگەڵ دەستبەكار بوونی كابینەی نۆی حكومەتی هەرێم بە سەرۆكایەتی مەسرور بارزانی، لە 10/7/2019 كە تا ئێستا بەردەوامی هەیە و ماوەی زیاتر لە شەش ساڵە لەكاردایە،13 مووچەی تەواوی دابەشنەكردووە و 10 مووچەشی بە لێبڕینی لە%18 و %21 دابەشكردووە، هەروەها 54 مووچەشی بە تەواوی خەرجكردووە.
هاوکات، ساڵی 2020 خراپترین ساڵ بوو بۆ مووچەخۆرانی هەرێمی كوردستان، چونكە حكومەت لەو ساڵەدا حەوت مووچەی فەرمانبەرانی دابەشنەكرد، هەروەها مووچەی مانگەكانی ئەیلول و تشرینی یەكەمی بەلێبڕینەوە دابەشكرد، لەگەڵ ئەوەشدا مووچەی مانگەكانی تشرینی دووەم و كانونی یەكەمیشی دابەشنەكرد، بۆیە كابینەی نۆ لەو ساڵەدا ژمارەیەكی پێوانەیی بۆ دابەشنەكردنی مووچە تۆماركرد.
لە بەدواداچوونەكانی SNNئەوەشهاتووە، لە ساڵی 2021 شەش مووچەی سەرەتای ساڵ بە لێبڕینی لە %21 دابەشكرا، هاوكات لە ساڵی 2023 سێ مووچەی كۆتایی ساڵ خەرج نەكرا، هەروەها لەساڵی 2024 مووچەی مانگی 12 خەرجنەكراو ئێستاش كە لەكۆتایی ساڵی 2025داین، هێشتا مووچەی مانگی 10 خەرج نەكراوە و دوو مووچەی مانگەكانی 11 و 12 ش چارەنوسییان نادیارە، بۆیە ساڵی 2022 باشترین ساڵی مووچەخۆران بوو، كە لەوساڵەدا تەواوی مووچە دابەشكرا.
