دانا ئەحمەد مەجید “گۆڕان هەر یەک گۆڕانە”

SNN

ڕێکخەری گشتیی بزووتنەوەی گۆڕان کۆتایی بە دەنگۆی جیابوونەوە و ناکۆکییە نێوخۆییەکان دەهێنێت و جەخت لەوە دەکاتەوە کە بزووتنەوەکەیان پارچە نەبووە، هاوکات وەڵامی پرسیاری مانەوەیان لە حکومەت و وادەی بەستنی کۆنفرانس بۆ ڕای گشتی دەخاتەڕوو.

گۆڕان هەر یەک گۆڕانە و جیاوازی نییە
دانا ئەحمەد مەجید، ڕێکخەری گشتیی بزووتنەوەی گۆڕان لە لێدوانێکدا بۆ میدیاکان ڕایگەیاند، هیچ جۆرە دابەشبوونێک لەنێو ماڵی گۆڕاندا بوونی نییە و ئەوەی هەیە تەنیا یەک بزووتنەوەیە. ناوبراو بە ڕاشکاوی گوتی “گۆڕان هەر یەک گۆڕانە و جیاوازیی نییە”، بەمەش وەڵامی ئەو قسانەی دایەوە کە باس لە دروستبوونی باڵی جیاواز لەنێو بزووتنەوەکەدا دەکەن.

کۆمیسیۆن کاتی کۆنفرانس دیاری دەکات
سەبارەت بە پرۆسەی نوێبوونەوە و بەستنی کۆنفرانس، ڕێکخەری بزووتنەوەکە ئاماژەی بەوە کرد کە بەمزووانە هەمووان پێکەوە بەشداری لە کۆنفرانسێکی گشتیدا دەکەن. دەربارەی کات و شوێنی بەڕێوەچوونی کۆنفرانسەکەش، دانا ئەحمەد مەجید ڕوونیکردەوە کە ئەو بابەتە لە دەسەڵاتی ئەواندا نەماوە و کۆمیسیۆنی باڵای سەربەخۆی هەڵبژاردنەکان خۆی ڕۆژ و شوێنی سازکردنی کۆنفرانسەکە دیاری دەکات.

پرسی مانەوە لە حکومەت و بڕیاری کۆنفرانس
لە وەڵامی پرسیارێکی کەناڵ8ـدا سەبارەت بەو ئەگەرەی کە ئەگەر کۆنفرانس ساز نەکرێت، ئایا ئامادەن بە ناونیشانێکی دیکە درێژە بە سیاسەتی خۆیان لەنێو حکومەتدا بدەن؟ دانا ئەحمەد مەجید خۆی لە وەڵامێکی یەکلاکەرەوە بەدوور گرت و ڕایگەیاند، لە ئێستادا ناتوانێت وەڵامی ئەو پرسیارە بداتەوە، چونکە یەکلاکردنەوەی پرسێکی چارەنووسسازی لەو شێوەیە تەنیا لە دەسەڵاتی کۆنفرانسدایە و دەبێت لەوێ بڕیاری لەسەر بدرێت.