مارکا ساڤیا پەیامێکی توندی ئاڕاستەی “گەندەڵکارانی” عێراق دەکات

SNN

مارک ساڤایا، نوێنەری تایبەتی ئەمەریکا لە عێراق بەبۆنەی ساڵی نوێوە پەیامێکی پیرۆزبایی و هۆشداریی ئاراستەی گەلی عێراق و لایەنە جیاوازەکان کرد، دەڵێت : “کۆتایی بە گەندەڵی و چەکی بێسەروبەرە دەهێنین”.

لە پەیامەکەی مارک ساڤیادا بۆ گەلی عێراق بەرپرسەکانی تیایدا هاتووە، “هێز و خۆڕاگری ئێوە سەرچاوەی ئیلهامە بۆ جیهان. ساڵی نوێ دەبێتە ساڵی هەلی باشتر و سەقامگیری بۆ هەموو عێراقییەکان.” هاوکات، کارکردن لەگەڵ حکوومەتی عێراق تەنیا لە چوارچێوەی دەستوور و یاسادا دەبێت بۆ دابینکردنی داهاتوویەکی گەش.

مارک ساڤیا لە پەیامەکەیدا لیستێکی وردی ئەو گرفتانەی خستووەتە ڕوو کە بڕیارە لە ساڵی 2026دا کۆتاییان پێ بهێنرێت، گرنگترینیان؛ کۆتاییهێنان بە ناسەقامگیری، چەکی بێ مۆڵەت، میلیشیاکان، گرژییە ناوخۆییەکان و دەستوەردانی دەرەکی. هەروەها بنبڕکردنی گەندەڵی، تاڵانکردنی سامانی وڵات، سپیکردنەوەی پارە، گرێبەستە وەهمییەکان، دزی و فێڵکردن لە یاسا. لەگەڵ چارەسەرکردنی بێکاری، هەژاری، نەخوێندەواری، کەمیی خزمەتگوزارییەکان، نادادی و ستەم.

نێردەکەی ترەمپ لە عێراق بەشێکی پەیامەکەی ئاراستەی ئەو کەسانە کردووە کە دەستیان لە گەندەڵیدا هەبووە و پێیان دەڵێت”ئەم قسانە بۆ ئەو کەسانەیە کە لەسەر خاکی عێراق گەندەڵییان کرد؛ کاتی ئێوە کۆتایی هات و ئێستا کاتی عێراق و عێراقییەکانە، ئاڵای عێراق بە بەرزی دەمێنێتەوە و وڵات دەبێتە جێگەی شانازی بۆ هەمووان.”