دۆخی مووچەخۆرانی حکومەتی عێراق و هەرێم

مووچەخۆرانی عێراق لە 2025دا مووچەی هەموو مانگەکانیان وەرگرتووە، بەڵام مووچەخۆرانی هەرێم مووچەی مانگی 11 و 12یان وەرنەگرتووە، هاوکات ئەمڕۆ لە عێراق مووچەی مانگی یەکی ساڵی نوێ دابەشدەکرێت.
دۆخی مووچەخۆرانی هەرێم لە 2025دا باش نەبووە و مووچەکانیان لە کاتی خۆیدا وەرنەگرتووە، بە جۆرێک لە رۆژەکانی کۆتایی ساڵدا مووچەی مانگی 10یان وەرگرتووە، چارەنوسی مووچەی مانگەکانی 11 و 12 بە نادیاری ماوەتەوە.
د.فازڵ نەبی بریکاری پێشووتری وەزارەتی دارایی عێراق لە لێدوانێکی پێشتریدا بۆ SNN رایگەیاندبوو، هەردوو مووچەکەی 2025 دەفەوتێت و حکومەتی عێراق لە 2026دا خۆی ناخاتە ژێرباری ئەو دوو مووچەیەوە.
هاوکات، مووچەخۆرانی عێراق لە 2025دا مووچەی هەر 12 مانگەکەی ساڵیان وەرگرتووە، تەنها لە دوو مانگی کۆتایی ساڵەکەدا چەند رۆژێک مووچەکانیان دواکەوتووە، لە دەستپێکی ساڵی نوێشدا عێراق دەستیکردووە بە دابەشکردنی مووچەی مانگی یەکی ئەمساڵ.
بانکى ڕافیدەین لە ڕاگەیەنراوێکدا ئاماژەى بەوەکردووە، لە ڕێگەى ئامێرەکانى پارەدانى ئەلیکترۆنى دەستیکردووە بە دابەشکردنى مووچەى مانگى یەکى خانەنشینانى شارستانى و سەربازى.
ڕاشیگەیاندووە، خانەنشینان هەر کاتێک کورتەنامەیان پێگەیشت، دەتوانن بچن مووچەکانیان لە لقى بانکەکان و دەروازەکانى پارەدانى ئەلیکترۆنى وەربگرن.
لە عێراق دوو ملیۆن و 950 هەزار خانەنشینى سەربازى و شارستانى، چوار ملیۆن و 400 هەزار فەرمانبەر هەیە، کۆى مووچەى مووچەخۆرانیش مانگانە شەش ترلیۆن دینارە