ئاستی ئاوی بەنداوەكان بەڕێژەیەكی بەرچاو زیادییان كردووە

عەلی حەمە سەعید-SNN
بەڕێوەبەری گشتی بەنداوەكانی هەرێمی كوردستان، ئاماژەبەوەدەكات بەهۆی ئەو شەپۆلی بارانبارینەی كە لە هەفتەی ڕابردوو هەرێمی كوردستانی گرتەوە داهاتی ئاو بۆ بەنداوە گەورەكان زیاترە لە 200 ملیۆن مەتر سێجایە زیادیكردووە، بەڕێوەبەری بەنداوی دووكانیش ئاشكرایدەكات كە لە بەنداوی دووكان نزیکەی 4 مەتر ئاو زیادیكردووە.

ڕەحمان خانی، بەڕێوەبەری گشتی بەنداتوەكانی هەرێم بە SNNی ڕاگەیاند: بەهۆی ئەو شەپۆلە بارانبارینەی كە لەماوەكانی هەفتەی ڕابردوو هەرێمی كوردستانی گرتووەتەوە لەو شەپۆلەدا بەنداوەكان زیاتر لە 250 ملیۆن مەتر سێجا ئاویان گلدراوەتەوە كە ئەوەش بڕێكی زۆر باشە لەم كاتەدا كە سەرەتای وەرزی زستانە ئەو ڕێژە زۆرەی باران بارین تۆماركراوە.

كۆچەر جەمال، بەڕێوەبەری بەنداوی دووكان بە SNNی ڕاگەیاند: بەهۆی ئەو شەپۆلی باران بارینەی كە چەند ڕۆژی رابردوو سنورەكەی گرتەوە، ئاستی ئاوی بەنداوی دوكان زیاتر لە سێ مەتر و نیو بەرزبووەتەوە.

ئاماژەی بەوەشكرد، هێشتا زووە باس لە سەرڕێژبوونی بەنداوی دووكان بكرێت، چونكە ساڵانی رابردوودا رێژەی دابارین كەمبووە، هاوكات ئەو بەنداوانەشی كە بەهۆی باران بارینی ئەمجارەوە سەرڕێژیان كردووە، بەنداوی گەورە نین وەك بەنداوەكانی دووكان و دەربەندیخان، بۆیە ئەو بەنداوانە زووتر سەرڕێژبوون.