ئاوی دوکان و دەربەندیخان 500 ملیۆن مەتر سێجا زیادیکردووە
SNN-
بەڕێوەبەرایەتی گشتی بەنداو و کۆگاکانی ئاو لە وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاندووە کە بەهۆی شەپۆلە چڕەکانی باران و بەفربارینەوە، داهاتی ئاو بە شێوەیەکی بەرچاو بەرزبووەتەوە.
هیوا عەلی، وتەبێژی وەزارەتی کشتوکاڵ و سەرچاوەکانی ئاو ڕایگەیاند، بەنداوەکانی هەرێم بەرزبوونەوەی بەرچاویان لە ئاستی ئاودا تۆمارکردووە، ئەمەش بووەتە هۆی زیادبوونی ئاوی ئەمبارکراو و دابینکردنی پێداویستییەکان بۆ ڕووبەڕووبوونەوەی وشکەساڵی و کشتوکاڵ و خواردنەوە.
دەشڵێت: ڕێژەی بارانبارین بەراورد بە ساڵی ڕابردوو دوو هێندە بۆ سێ هێندە زیادی کردووە، بە شێوەیەک تەنها لە ماوەی کەمتر لە مانگێکدا هەردوو بەنداوی دوکان و دەربەندیخان زیاتر لە 500 ملیۆن مەتر سێجا ئاوەکەیان زیادیکردوە و ئاستی ئاو دەربەندیخانیش 5 مەتر و لە دوکان 4 مەتر بەرزبووەتەوە.
ڕوونیشیکردەوە کە لە پارێزگای دهۆکیش بەنداوی سەرەکی نزیکەی ملیۆنێک مەتر سێجا ئاو زیادی کردووە و 41 سانتیمەتر بەرزبووەتەوە، بەنداوی گۆمەسپانیش بە هەمان بڕ ئاستی ئاوەکەی زیادیکردووە و مەترێکیش بەرزبووەتەوە، هەروەها بەنداوە بچووک و مامناوەندەکان لە ناوچەکانی گەرمیان، سلێمانی، هەولێر و دهۆک بە سەرکەوتوویی لافاوەکانیان کۆنتڕۆڵ کردووە و زۆربەیان گەیشتوونەتە ئاستی سەرڕێژکردن و لەو بڕوایەشدا بوو کە لەگەڵ توانەوەی بەفری چیاکاندا ئاستی ئاوی بەنداوەکانیش بەرزتربێتەوە.
